Shillong, Naiwieng 11
Ka Nongspung SC ka la khur jingjop ha ka First Division Football League ba la pynïaid da ka Tyrsad Area Sports Association (TASA), hadien ba ka la pynliem noh ïa ka Mawlum Tyrsad SC da 2-1 kol ha ka sngi Ba-ar.
Kane ka nam jop ka la wan urlong lyngba ki ar kol ba la thep da u Mardalis Kharsyiemïong na ka bynta ban pynlong ïa ka Nongspung ban khur ïa ki lai poiñ.
Ha kane ka jingïalehkai kaba la long ha madan Mawlum Tyrsad, baroh ar ki kynhun ki la pyrshang ban ïakhun tyngeh naduh kaba sdang. Ka Nongspung ka la pynkhih jar nyngkong lyngba u Mardalis ha ka minit kaba 27 na ka bynta ban tam shi kol ha ka kylla step.
Hadien katto katne por ba la bteng ïa ka jingïakhun jong ka kylla miet, ka Mawlum Tyrsad ka la lah ban pynphai kylla shi kol lyngba ka penalty ba la shut da u Marcelleno Khongsit (70). Hadien lai minit u Mardalis u la thep biang sa shi kol na ka bynta ban pynlong ïa ka Nongspung ban khur ïa ka jingjop.
Haba phai sha kawei pat ka jingïakhun kaba la long kham hashwa hapdeng ka Wahlyngkien Sunei SC bad ka Umkseh SC ki la ïasam mar shi poiñ hadien ba ki la ïakhaid mar 1-1 kol.
Tang mar ïasdang ka jingïalehkai, ka Wahlyngkien Sunei ka la ïoh ban pynkhih jar nyngkong eh lyngba u Ïakitlang Marbaniang ha ka minit kaba 5, hynrei ka Umkseh ka la lah ban pynphai kylla lyngba u Teidorlang Rani ha ka minit ba 63.
Kane ka lympung kan bteng biang ha ka 14 tarik hapdeng ka Rangshangkham SC pyrshah ïa ka Mawkynroh SC ha ka por 12 baje, katba ka Mawdngong SC ïa ka Mawsawrit SC ha ka por 2:30 nohphai sngi.
