Shillong, Naiwieng 11
Ka Sei La Sap FCC bad ka Mawkhar SC ki la khur ïa ki jingjop ba nyngkong ha ka lympung ïalehkai SSA Champions Cup 2026, ha ka sngi Balang ha SSA Stadium, Polo bad ka la long ka jingplie lad ba kin don ha ka thong jingïa-knieh ban ïoh rung sha ka semi-final.
Ha kane ka jingïakhun ka Sei La Sap ka la lah ban pynliem ïa ka Sohryng-kham da 4-2.
Shwa ban sdang kane ka jingïakhun, ki bor ka mariang ba kynthup ïa ka lyer u slap bad u phria, la hap ban sdang hadien shiteng kynta na ka por ba la buh.
Hynrei kane kam shym la pynduh mynsiem ïa ka kynhun ïalehkai ka Soh-ryngkham hadien ba ka la ïoh ban pynkhih jar nyng-kong lyngba u Damang -langki Makdoh (2). Ka Sei La Sap ka la pyrshang ban ïakhun tyngeh bad dei tad haba wan ban bteng ïa ka kylla miet, ba ka la ïoh ïa ka kabu ban pynphai ïa kane ka shi kol ba ka la shah tam shakhmat lyngba u Kennyson Khyriem (49′) bad hadien kane, ka la ïoh ïa ka kabu ban tam kylla pat shakhmat da ka jingïoh thep ïa ka kol kaba ar lyngba u Freestar Kharbangar (75).
Pynban ka jinglah ban tam shakhmat kam shym la neh slem hadien ba u Bankynshew Warjri (79) ka Sohryngkham u la ïoh ban thep ïa ka kol kaba ar.
Hynrei ka por ban ïalehkai ka dang sah, kaba plie lad ïa ka Sei La Sap ba kan sei lut ïa ka buit ka bor ïalehkai jong ka tad haduh ba kan da ïoh ba kan thep sa ïa ki ar kol kiba sah lyngba u Eddiesius Kharkong -or (85) bad u Melbertson Kharbangar (90+6) kaba la biang pura ïa ka ban khur ïa ka jingjop.
Hadien kane, ka kynhun ïalehkai ka Mawkhar kaba la mih madan, ka la pynliem noh ïa ka Sanmer da 2-1.
Ïa ki kol na ka Mawkhar SC, la thep lyngba u Vobisterfield Mar-ngar (35′) bad u Mackiven Shyrkon (69′) katba ïa ka shi kol ka Sanmer la ïoh ban thep da u Isharwer Mukhim (71).
Na ka liang ka Sanmer, ka la pyrshang kat lah kat ïai ban jop ïa kane ka jingïakhun, hynrei ha kaba kut kam shim la lah ba kan pynurlong ïa la ka jingthmu jong ka, hynrei ka la hap ban pdiang ïa ka jingshah rem kaba ar ha kane ka lympung.
Ki jingïakhun ki ban wan kin long ha ka sngi Saitjaiñ, ha ka por 11 baje mynstep ka Shillong Lajong kan ïakhun pyrshah ïa ka Sei La Sap, katba ka Mawlai SC ïa ka Mawpdang SC ha ka por 2:30 nohphai sngi.
