Texas, Jylliew:
San ngut ki khynnah ki la mynsaw bad la shu pynkit noh ia ki nalor suiñ na ka bynta ki jingsumar hadien ba ka lynti iaid kjat kaba don ha ka park ha Surfside Beach ka la khyllem bad dkut ha ka Sngi Palei. Ha kane ka jingjia, la don ruh sa 16 ngut kiba mynsaw na katei ka jinghap jong katei ka lynti iaid kaba don hapoh ka nongbah Texas.
Katba, la ong pat ba ym shym don ba mynsaw jur ne ba ngat hapdeng ka jingma wat haba ki la ur bad hap na katei ka lynti iaid kjat ha katei ka jingjia.
Kitei ki khynnah kiba naduh ka 14 haduh 18 snem ka rta, ki dei kiba wan jurip na Cypress bad Tomball, shabar jong ka Houston bad Spring Branch. Kitei ki khynnah ki dang wan phai na ka jingleitkai lyiur ba la pyniaid da ka Bayou City Fellowship.
Ki heh ki la iathuh ruh ba katei ka la jia ha ka por kumba 1 baje nohphai sngi hapoh Stahlman Park, kaba long ka jaka ba la buh kyrpang naka bynta ban leit kai sha ki bynta jong ka rud duriaw bad kaba lah ruh ban iohi ia ka madan Gulf jong ka Mexico. Katei ka bynta rud duriaw ha Surfside Beach ka don kumba 60 mile ka jingheh bad ka don sha ka phang South jong ka Houston.
Ia ka daw jong katei ka jingkdiah ka lynti iaid kjat, ym pat lah satia ban tip shai bad kumta ruh ki tnat ba dei khmih ki dang tohkit bad wad bniah ban lap ia ka daw jong katei ka jingjia ha katei ka sngi.
Ia kitei ki 5 ngut kiba la kham mynsaw jur napdeng jong kitei kiwei, la shu rah noh da ka liengsuiñ sha ka Memorial Hermann Hospital kaba don hapoh Houston hi. Katba ia kiwei pat ki 6 ngut ki khynnah, la pynkit noh sha ki jaka sumar kiba don ha katei hi ka thaiñ lyngba ki kali kit nongpang bad kumba 10 ngut pat la kit hi noh da ki kali shimet.
