Aizawl, Jylliew:
Ka Ïing Kashari (Prevention of Corruption Act) jong ka nongbah Aizawl ha ki khyndiat sngi kiba la leit noh ka la tian bishar bad pynmih da ka rai ban set patok haduh 5 snem ïa uwei u rangbah ba la 45 snem ka rta na ka daw jong ka jingdonkti ha ki kam bam sap.
Na ka liang ka ïing kashari ka la daiñ kuna ruh haduh T.20 lak ïa utei u rangbah uba la tip kyrteng kum u Mustaqur Rahman, uba dei uwei na ki runar ba la donkti ha ka kam bam sap jong kawei ka kompani (public sector firm) kaba la kot shaduh ka T.268 lak.
Dang ha ka taiew kaba la dep na ka liang u nongïasaiñ ka ïïng kashari – Lalrinchhana u la tian bishar bad rai pynrem pyrshah ïa u Rahman na ka daw jong ka jingdonkti jong u ban pyndonkam bakla ïa ka pisa bad na ka daw jong ka jingdonkti jong u ha ki kam thok kam shukor. Dei ha kane ka taiew kaba mynta ba na ka liang ka ïing kashari ka la pynmih ïa ka rai ban set patok 5 snem ïa u Rahman.
Kat kum ki jingïoh lum khubor la ïathuh ba u Rahman u ba dei u nongshong shnong ka nongbah Guwahati u la pyndonkam bakla ïa ka kyrdan jong u kum u ‘consultant’ jong ka Mizoram Agriculture Marketing Corporation (MAMCO).
U Rahman u la shah kem ha ryngkat u Lalremthanga – managing director barim jong ka MAMCO ha u snem 2015 na ka daw jong ka jingdonkti jong ki ban pyndonkam bakla ïa ka pisa haduh T.268 lak. Ha kaba ïadei bad u Lalremthanga la ïathuh ba na ka liang ka ïing kashari ka la dep ban tian bishar ïa u ha u Naiwieng jong u snem ba la dep. Ïa u la rai pynrem da ka jingshah set patok kaba 5 snem ha ryngkat T. 5 lak ka kuna.
