New Delhi, Jylliew:
Ka kynhun ialehkai siat Khnam ka ri mynta ka mad ia ka jingshah pynkhyllem noh ka jong u hapoh ki jingeh kiba ka iakynduh pyrshah ia ka kynhun ialehkai kaba khlain bor na Korea bad China, na ka bynta ban duh noh ia baroh ki hynriew tylli ki jingiakynduh phainal ki jong ka na ka bynta ban pynwai noh syndon ia ka jingiaid lynti jong katei ka kynhun ha ka lympung ialehkai ba mynta ka Asia Cup Stage 3; ha kaba mynta ka lah shong ha ka kyrdan ba 5 ha ka miej khur takma jong katei ka lympung.
Watla ka kynhun kam shym la lah ban khur wat tang kawei ka takma Ksiar na ka lympung, pynbna ka lah pyndep noh ia ka jingiaid lynti jong ka da ki 7 tylli ki takma ba ka lah khur kata 6 ka Rupa bad 1 ka Rnong. Katba ka kynhun Korea kaba long ka shlem ba khlainbor jong katei ka jingialehkai, ka la lah ban khur shalade ia ki 4 takma Ksir, 1 ka Rupa bad 2 ka Rnong na ka bynta ban khur ia ka kyrdan ba 1 ha ka miej khein takma bad ka China ka lah wan ha ka kyrdan ba 2 da ki 4 takma Ksiar bad 3 tylli ka Rnong.
Haba phai sha ka jingialehkai, ka kynhun India ka lah sdang ia ka sngi ialehkai da kaba shah rem noh ha ka Korea da ar dor-thong (232-234) ha ka jingiakhun phainal jong ka kynhun ialehkai ki kynthei ha ka Compound.
Na ki saw dor-thong jingiapher ha kaba kut jong ka bynta ba nyngkong, ki lai ngut ki thei ialehkai ka ri kata ka Sakshi Chaudhary, Pragati bad Deepika ki la lah ban khyllie ia ka kynhun ialehkai jong ki na ka bynta ban pynlong ia ka kynhun ban khur ia ki 175-176. Hynrei ka jingiakhun ba khatduh kawei na ki nongialehkai ka lah siat ia u Khnam sha ka 8 na ka bynta ka jingshah pynhiar kynsan ka kynhun ha ka Korea kaba lah khur ia ka jingjop. Ka kynhun ialehkai Compound ki shynrang ka iai bud ia kajuh ka lynti jong ka kynhun ki kynthei, ha kaba katei ka kynhun ka lah shah em noh da 235-238. Ha ka jingiakob siat Recurve ki shynrang ha ka jingiakhun phainal, ka India ka lah shah rem noh da 5-1 ha ka China.
