Auckland, Jylliew:
U snar kawang bol jong ka kynhun ialehkai kriket ka New Zealand u Trent Boult, mynta u lah ban leitphai biang sha katei ka kynhun ialehkai na ka bynta ka jingioh ban shimbyntalang bad ka kynhun baroh kawei ha ka lympung ODI World Cup ka ban sa long hadien mynta u snem, watla utei u rangialehkai um shym la don satia kano kano ka jingiateh kontrak ialehkai bad ka ri jong u.
Shuh shuh ruh ka khubor ka iathuh ba u Boult u lah jied ia ka lynti na ka bynta ban ym iasoi kontrak shuh bad ka New Zealand Cricket (NZC) ha u snem ba la dep, ha kaba ka lah ailad ia u ba un ialehkai ha ka lympung ialehkai ba paw jong ka Australia ka Big Bash League. Kumta ruh u long urangialehkai u bym shym la shah kynthup ha ka thup kyrteng jong ki rangialehkai kiba shah tyrwa na ka bynta ka jingiateh kontrak bad ka synjuk, hynrei uba lah soi pat ia ka “Casual Playing Agreement”. Kumta ka kynhun baroh kawei ka khmih lynti ba u Boult u lah mynta ban sdang biang ia ka jingiatreilang sa shisien bad u kapten jong ka kynhun ialehkai Test u Tim Southee ha katei ka lympung ialehkai World Cup 50-over ka ban sa long ha India naduh u bnai Risaw 2023. U Boult u long ruh uwei na ki nongialehkai ba kynsai tam ha ka pyrthei khamtam eh ha ka kam kawang bol ka jng u ha ka jingialehkai ODIs, ha kaba u la lah ban khur haduh 187 wiket ha kata ka kyrdan bad sa 74 wiket shuh shuh shakhmat na ka bynta ka kynhun ialehkai ka ri jong u ha ka lympung ialehkai T20. Shuh shuh utei urangialehkai uba lah dep ban khur ia ki 317 wiket ha ka jingialehkai Test, u dang lah mynta ban wanphai biang sha ka kynhun baroh kawei na ka bynta ka jingiakhun ha-iing ka ban wan pyrshah ia ka South Africa bad hadien kata sa ka jingiakhun pyrshah bad ka Australia.
