Kolkata, Jylliew:
Ka kynhun Enforcement Directorate ka la khot hajir ïa u MP jong ka seng Trinamool bad u National General Secretary u Abhishek Banerjee, uba dei u khun kha jong ka Myntri Rangbah jong ka West Bengal ka Mamata Banerjee, na ka bynta ka jingtohkit halor ka jingdon jong ka kam bamsap kaba la mih na ka jingthep kam ïa ki nonghikai ha ka 13 tarik, Jylliew.
Kane ka jingkhot hajir ka la long naba ka kurim jong u Abhishek ka Rujira ka la shah tohkit ha ka kynhun tohkit ha kaba ïadei bad ka jingjia jong ka jingtuh ïa u dewïong.
Ha ka sngi Palei, ka Rujira ka la shah tohkit bniah ha ka kynhun ED lajan saw kynta ha ka jaka treikam jong ka kynhun ED ha Kolkata.
U Abhishek u la ong ba un ym leit na ka bynta ka jingshah khot hajir naba ïa mynta u dang bunkam eh ha kaba ïadei bad ka jingdon jong ka jingïalap ilekshon ha kaba u la hap ban ïadon bynta lang.
Ka jingshah khot hajir ka la jia ryngkhat ha ka sngi ba la pynbna ban pynlong ïa ka ilekshon Panchayat ha ka jylla.
Ka ilekshon Panchayat ha West Bengal kan sa long ha ki lai bynta, ha kaba la buh ban sdang ha ka 8 tarik, Naitung, la ong u State Election Commissioner u Rajiv Sinha ha ka sngi Palei.
Naba ka kurim jong u ka dang shah tohkit da bun kynta, hadien ba ka la hap pep ban leit sha UAE, u Abhishek u la pynshisha ba ka la long ka jingleh donbor ïa ki dkhot ka longïing jong u ha kaba ka la don jingthmu ruh ban khanglad ïa u ha ka ban pynlong ïa ka jingïalap na ka bynta ka Panchayat ilekshon ha West Bengal.
Ka Rujira ka la shah khang lynti noh ha ryngkat arngut ki khun jong ka ha ka jaka sangeh liengsuiñ ka Kolkata ha ka lah sngi U Blei haba ka la thmu ban leit sha UAE.
Ka la hap ban leit na ka bynta ka jingshah khot hajir hakhmat ka kynhun tohkit ha ka por 11 baje mynstep jong ka 8 tarik, Jylliew.
