New Delhi Jylliew:
Na ka liang jong ka Asian Cricket Council (ACC) kaba hap hapoh ka jing-ialam da u nongpyniaid bahakhliehduh ka BCCI u Jay Shah, ka pynbna paidbah mynta ba ka lah ban shah bad mynjur ia ka jingai jingmut da u nongialam ka PCB u Najam Sethi ha kaba iadei bad ka ‘Hybrid Model’ na ka bynta ban pynlong ia ki saw tylli ki jingialehkai jong ka lympung Asia Cup khlem ka kynhun ialehkai na India ha Pakistan; katba ki jingialehkai kiba sah yn pynialehkai ha ka ri Sri Lanka ha Galle bad Pallekele.
Nangta ruh ka ACC ka iathuh ba kan sa pynlong ia ka jingpynbna ba kyrpang mynta ka sngi (ba-ar) shisien ia katei ka jingai jingmut da u Sethi yn lah ban pdiang ia ka mynta bad kan long ruh ka jingplie mynta ia ka jynkhang na ka bynta ka kynhun ialehkai Kriket na Pakistan na ka bynta ban wan sha India ban shimbynta ha ka ODI World Cup ka ban sa long naduh u bnai Risaw haduh u Naiwieng 2023. Kumta, mynta ka Pakistan kan ym don kano kano ka jingeh na ka bynta ban ialehkai ha Ahmedabad.
Hynrei kumba ka long mynta, ki saw tylli ki jingialehkai khlem ka kynhun ialehkai ka ri (non-India games); kata ka jingiakhun hapdeng ka Pakistan & Nepal, Bangladesh & Afghanistan, Afghanistan & Sri Lanka bad Sri Lanka & Bangladesh kin long ki jingiakhun ia kaba yn pynialehkai ha Gadaffi Stadium kaba don ha Lahore.
Shuh shuh ruh ki ar tylli ki jingialehkai hapdeng ka India & Pakistan bad baroh kiwei pat ki jingialehkai Super Four Games ki lah ban long ha Pallekele ne ha Galle; ha kaba ia ka lympung Asia Cup lah khmih lynti ba kan sa long ha u bnai Nailur mynta u snem.
Ha kaba iadei bad katei ka bynta, lah sngewthuh shai ruh ba shisien ba u CEO jong ka ICC u Geoff Allardice bad u nongpyniaid bahakhliehduh ka synjuk u Greg Barclay kin leit ban iuhkjat ha Karachi na ka bynta ban iakynduh bad u Sethi, lah rai ruh ba ka Pakistan kan ym buh kino kino ki kyndon ki ban wan pat na ka bynta ka lympung ialehkai World Cup, nalor ki saw tylli ki jing-ialehkai ia kaba yn pynlong ha katei ka ri naba ka ioh mynta ia ka hok ha ka ban pynlong ia ki jingialehkai jong ka lympung.
Ka jingpynlong ia ki jingialehkai khlem ka kynhun ialehkai na Pakistan ka lah ruh ban kdew-shai ruh ba ki nongpyllait paidbah ia ki jingialehkai kin ioh mar shiteng na ka jingsiew kaba lah iakut namar jong ka jingthikna ki ar tylli ki jingialehkai hapdeng ka India bad Pakistan. Kane ka lah ruh ban long ka lad ka lynti na ka bynta ka jingialehkai kaba lai, kata ruh sa tang lada kitei ki ar kynhun ki ioh ban rung sha ka phainal. Katei ka jubab ha kaba ka ACC ka lah ban ai mynta halor ka jingkyrpad jong u Sethi ka long kawei ka bynta kaba larkam tam ha kaba katei ka bynta ka lah ban lam ruh ia ka kynhun ialehkai ka Pakistan ba kan wan sha India khlem da buh kino kino ki kyndon.
