9 kol pynliem ka West Jaiñtia ïa ka North Garo, 7 kol ka Ri Bhoi ïa ka South West Garo

Haba phai sha ki jingïakhun jong ki shynrang, ka South Garo Hills ka la pynliem noh ïa ka South West Garo Hills da 3-1 kol.

Shillong, Jylliew 13:

Ka lympung ïalehkai State Level Under-12 Football Tournament 2023 ka la nangjam shaphrang ha ka Sngi Ba-ar ha SAI Training Centre ha kaba ka West Jaiñtia Hills ka la pynjem khnap ïa ka North Garo Hills da 9-0 kol bad ka Ri Bhoi ka la bteng ban khur jingjop da kaba pynliem sa ïa ka South West Garo Hills da 7-0 kol.

       Ha ka jingïakhun jong ki kynthei, ka Ri Bhoi ka la pynjem khnap ïa ka South West Garo Hills haduh 7-0 kol. Ka Mebanrihun Syngkli (2, 9 & 47) bad ka Ebilin Thangkhiew (11, 44 & 32) ki la khur ïa ki hat-trick, katba ka Delightful Lyngdoh ka la ïoh shi kol ha ka minit 49.

       Ka Eastern West Khasi Hills ka la pynliem noh ïa ka East Garo Hills da 2-0 kol. Ïa kine la thep da ka Rimeiaka Nongsiej ha ka minit kaba 2 bad ïa kawei pat la pynbud da ka Dawanpynkmen Nongphud ha ka minit ba 18.

       Ka West Garo Hills ka la jop ïa ka South Garo Hills da 3-0 kol. Ka Anamika ka la thep ar kol ha ka minit kaba 4 & 25 bad ïa kawei pat la pynbud da ka Dorimchi ha ka minit kaba 16.

       Ka North Garo Hills ka la shah rem ha ka West Jaiñtia Hills haduh 0-9 kol. Ka Stefy ka la khur ïa ka hat-trick hadien ba ïoh thep ha ka minit kaba 12, 22 & 39. Ïa ki ar kol la thep da ka Duka (18 & 40) bad ka Cathlyne (35 & 37). Katba ar tylli kiwei pat ki kol la thep da ka Ester (44) bad ka Hunbait (50).

       Haba phai sha ki jingïakhun jong ki shynrang, ka South Garo Hills ka la pynliem noh ïa ka South West Garo Hills da 3-1 kol. Tang mar ïasdang ka jingïalehkai ka South West Garo ka la ïoh ban pynkhih jar nyngkong eh lyngba u Arando D. Sangma (2), hynrei u Sengcheng R. Marak u la lah ban pynphai kylla ar kol na ka bynta ka South Garo ha ka minit kaba 16 & 17 bad ïa kawei pat la pynbud da u Chedo N. Sangma (13) na ka bynta ban khur ïa ka jingjop.

       Ka West Garo Hills ka la ïasam mar shi dor-thong (point) ha ka jingïakhun pyrshah ïa ka East Garo Hills hadien ba ïakhaid mar 2-2 kol. Na ka West Garo Hills la thep da u Eric Salgrima A. Sangma (5) bad u Reu Kyrem M. Sangma (25), hynrei u Aga Achang Momin (12 & 23) u la lah ban pynphai kylla ar kol na ka bynta ka East Garo.

       Ka Eastern West Khasi Hills ka la pynliem noh ïa ka East Jaiñtia Hills da 3-0 kol. U Arki Mawlong u la thep ar kol ha ka minit kaba 9 & 30, katba ïa kawei pat la thep kham hashwa da u Arbitstar Pathaw (7).

Katba ka North Garo Hills ka la ïasam mar shi dor-thong (point) ha ka jingïakhun pyrshah ïa ka South West Khasi Hills hadien ba kim shym lah ban thep kol.