Paris, Jylliew:
Ha ka rynsan iakob pynmareh kali ia kaba la tip kum ka ’24 Hours of Le Mans’, ka khubor ba lah ioh lum ka iathuh ba ka kynhun jong ka Ferrari ka lah pawshakhmat kum ka nongjop bad ka lahduh. Kane ka wan urlong lyngba u nongniah ba paw jong ka u Antonio Giovinazzi ryngkatlang bad ki paralok ba ialehkai na kajuh ka kynhun kata u Alessandro Pier Guidi bad James Calado ki la lah ban ai sha ka kynhun ialehkai ia ka jingjop na ka lympung.
Shuh shuh ruh ka khubor ka iathuh ba katei ka lympung ialehkai ka long ka lympung ha ka ban pynleit jingmut bha da ki nongialehkai kum kawei na ki jingialehkai ha ka jingiakob pynmareh kali kaba ju long man la u snem hajan jong ka shnong Le Mans, France. Lah niew ruh ia katei ka lympung kum kawei na ki lympung ialehkai ba pawbha ha ka pyrthei. Kumta katei ka jingjop ka pruid dak ruh mynta ia katei ka kynhun ialehkai ia ka jingkhur jingjop ba 10 baroh-lin ka jong ka ha Le Mans bad ka jingjop ba khyndai ba katei ka kynhun ka la lah ban khur ka long ha u snem 1965.
Na ka liang jong u Charles Leclerc uba niah mynta na ka bynta ka Scuderia Ferrari ha ka lympug F1 u pynpaw ia ka jingkmen kaba khraw halor ka jinglah katei ka kynhun ban rah ia ka nam lahduh ha katei ka lympung ialehkai ba mynta.
