Indonesia, Jylliew:
Ka khlur ialehkai Badminton ba pawkhmat bha jong ka ri India ka PV Sindhu sa shisien biang pat ka lah ioh ban wanphai sha ka jinglah jong ka ban ialehkai bha da kaba pynliem noh ia ka nongiakhun pyrshah kaba na Indonesia ka Gregoria Mariska Tunjung ha baroh shi lynter jong ki jingialehkai ha kaba sdang jong ka jingiaid lynti ki arngut ha ka lympung ialehkai ba mynta ha Jakarta ka Indonesia Open World Tour Super 1000.
Kumjuh ruh katei ka nongialehkai kaba lah khur arsien ia ki takma na ka lympung ialehkai Olympic bad kaba long ruh ka lahduh barim ha ka pyrthei, ka lah shimpor tang shiteng kynta tam na ka bynta ban jop pyrshah ia katei ka nongialehkai da 21-19 21-15 bad kaba mynta ka lah ioh ban buh jaka ialade sha ka rynsan iakhun pre-quarterfinal. Ka long ruh ka sien jop kaba nyngkong jong ka Sindhu pyrshah ia ka Tunjung ha ki lai jingialehkai ba khatduh, ha kaba ka lah dep ban mad ia ka jingshah pynrem ha katei ka nongialehkai na Indonesia ha ka Madrid Masters jong ka jingiakhun phainal ka jong ki bad kumjuh ruh ha ka semifinal jong ka Malaysian Masters mynta u snem.
Hadien katei ka jngjop ba nyngkong ka jong ka, ka Sindhu kan hap ban pynkhreh bha ialade sa na ka bynta ka jingiakynduh pat bad kawei pat ka nongialehkai ka Tai Tzu Ying na Taiwan.
Ha ka jingiakhun jong ki shynrang, ka long ruh ka jingsdang jingjop na ka bynta uwei pat u khlur ialehkai ka ri u HS Prannoy, ha kaba ma u ruh kumjuh u lah paw shakhmat ha ka lympung hadien ba u la lah ban khur ia ka jingjop pyrshah ia u Kenta Nishimoto na Japan da 21-16 21-14. Shuh shuh ruh u Prannoy uba lah khur ia ka jingjop ha ka Malaysia Masters Super 300 ha u bnai ba lah dep, un pynkhreh mynt sa na ka bynta ban iakynduh pat bad u NG Ka Long Angus na Hong Kong ha ka rynsan iakhun pre-quarterfinal.
Ha kawei pat ka jingialehkai kata ha ka jingiakhun jong ki kynthei, ka Treesa Jolly ha ka jingiatreilang bad ka Gayatri Gopichand ki lah khyllem noh na ka lympung ha kaba sdang jong ka jingiaid lynti jong ki ha ki thei iakhun pyrshah na Japan kata ka Rin Iwanaga & Kie Nakanishi da 22-20 12-21 16-21 ha ka jingiakhun kaba lah neh tang shi kynta 12 minit.
