Shillong, Jylliew 13:
Ka Meghalaya Cricket Association (MCA) ha ryngkat ka jingïatrei lang bad ka Meghalaya State Blood Transfusion Council & Regional Blood Bank, Pasteur Institute lem bad ka District Licence Blood Banks, kan pynlong ïa ka jingsynñiang snam ei ha nongbah Shillong, Nongpoh, Jowai, Tura, Nongstoiñ bad Williamnagar.
Kane ka prokram ka long shi bynta ban rakhe ïa ka World Blood Donor’ s Day ha ka 14 tarik mynta u bnai. Ha kane ka prokram ki nongïalehkai kriket ryngkat ki nongpynïaid jong ka synjuk ïalehkai kriket kin ïashim bynta ha katei ka jingsynñiang snam.
Ïa kane ka World Blood Donor Day la ju rakhe man la u snem da ki paidbah kylleng ka pyrthei ha ka 14 tarik u Jylliew. La ju rakhe ïa katei ka sngi kum ka sngi kha jong u Karl Landsteiner, uba la kha ha ka 14 tarik u Jylliew, 1868.
U Landsteiner u la ïohpdiang ïa ka khusnam Nobel Prize na ka daw ka jinglah ban lap ïa ka ABO blood group system. Ïa ka World Blood Donor Day la rakhe nyngkong ha u 2004 bad hadien la pynlong man la u snem da ka World Health Assembly ha u 2005.
