Shillong, Jylliew 14:
Ka MP na Tura ka Agatha K. Sangma ka la ai khublei ïa ka kynhun ki rangïalehkai phutbol U-19 ka Jylla halor ka jingïoh ban khur ïa ka takma ksiar ha ka 66th National School Games (NSG) kaba la long ha Bhopal kaba ha Madhya Pradesh.
Kane ka kynhun hapoh ka jingïalam u Jeffrey Warlarpih (coach) ka la lah ban pynliem noh ïa ka Punjab da 1-0 kol ha ka jingïakhun final kaba la long ha ka sngi Ba-ar.
“Nga ai khublei ïa ki rangïalehkai phutbol halor kane ka jingjop ha ka jingïakhun final jong ka National School Games. Ka jingkhlaiñ, ka jingïatrei lang bad ka jingtbit ha ka rukom ïalehkai ka la pynlong ïa ka kynhun ban kynjoh sha ka thong jong ka jingjop,” la pynpaw ka Agatha lyngba ka sla facebook lajong ha ka sngi Balang.
“Phi la wanrah ka jingsarong ïa ka Jylla hi baroh kawei. Nga kitbok ba phin nangïai tyngshaiñ bad ban nangïai kynjoh sha ka jingjop ha ki lympung ïalehkai ki ban wan.”
