Shillong, Jylliew 14:
Ka kynhun ïalehkai phutbol ka India kan ïakhun pyrshah ïa ka Lebanon ha ka jingïalehkai kaba khatduh jong ka Intercontinental Cup ka ban long ha Bhubaneswar ha ryngkat ka jingangnud ban ïoh rung ha ka kyrdan ba 100 jong ka FIFA.
Ka India ka la ïoh rung lypa sha ka final hadien ba ka lah pynliem ïa ka Mongolia bad ka Vanuatu ha ki jingïalehkai ba la dep.
Hynrei ha kane ka jingïakhun pyrshah ïa ka Lebanon kan long kaba kham jwat bha na ka bynta ka India. Kumba ka long mynta ka India ka la don ha ka kyrdan ba 101 bad ka Lebanon ha kaba 99. Lada ka lah ban khur ïa ka jingjop kan pynlong ïa ka India ban jam sha ka kyrdan ba 100.
Kumba ka paw ka India ka la ïoh bat teng ïa ka kyrdan 94 ha ka FIFA ha u Rymphang 1996 ha ka por ba dang ïalehkai ki rangïalehkai kum u Bhaichung Bhutia bad u IM Vijayan.
Na ka bynta ka Lebanon, kane ka jingïakhun ka long kaba kham kongsan namar kam shym la lah ban pynliem ïa ka Mongolia ha ka jingïalehkai ba la dep. Lada ka lah ban pynïakhaid kan pynlong ïa kane ka kynhun ban ïoh rung sha ka final pyrshah ïa ka India.
Hynrei lada ka Mongolia ka lah ban pynliem ïa ka Vanuatu ha ka jingïakhun ka ban long kham ha shwa bad lada ka Lebanon ka shah rem, kan pynlong ïa katei ka kynhun ban ïoh rung, hynrei kan shong ha ka jinglah ban thep kol (goal difference).
“Ngi la ïoh ban ïalehkai ha la ïing bad ngi la hiar sha kane ka lympung da ka jingthmu ban khur ïa ka jingjop,” la pynpaw u coach ka kynhun u Igor Stimac shisngi shwa ka jingïakhun.
“Kam pher watla ka Lebanon kam shym la lah ban ïalehkai bha ha ka jingïalehkai ba la lah, hynrei kan ïakhun tyngeh ha kane ka jingïakhun.”
“Na ka bynta jong ngi, kane ka jingïakhun kan long kaba kham eh bha namar ka liang pyrshah ka don ïa ki rangïalehkai kiba kynsai. Hooid ka lah ban don ïa la ki jingduna bad kane ka long kat kum ka jingïohi ïa ka rukom ïalehkai. Hynrei kane ka jingïakhun kan long kaba kham itynnad,” la bynrap utei u coach uba na Croatia.
Kumba ka paw ka India ka la shem jingeh ban thep kol pyrshah ïa ka Vanuatu, hynrei hashwa ban wai u Sunil Chhetri u la lah ban pynurlong ban khur ïa ka jingjop hadien ba u la ïoh ban thep ha ka minit kaba 80 ha ka sngi Thohdieng.
“Shibun kiei kiei kim shym la urlong kumba nga thmu, hynrei ngin hap ban peit bniah ïa kiba kum kine. Hynrei kiei kiei ki lah ban urlong lada ngi lah ban kynjoh sha ka thong,” la bynrap u Stimac.
“Ka long kaba kongsan eh ban jop ïa ka Lebanon namar ka long ka kynhun kaba khlaiñ bor. Ngi la ïohi ïa ka jingïalehkai ka Lebanon pyrshah ïa ka Mongolia,” la bynrap u Stimac.
