Shillong, Jylliew 19:
Ka kynhun ki ’thei ïalehkai jong ka PFR Football Academy lem bad ka Laitkor SC ki la khur ïa ka jingjop ha ka sngi sdang ïa ka lympung ïalehkai Women’s League ha ka Lah Sngi U Blei ha madan Third Ground, Polo.
Ha kane ka jingïakhun ka PFR Academy ka la pynjem khnap ïa ka Mawkriah West SC haduh 16-0 kol bad ka Laitkor SC ka la jop da shiteng dorjon (6-0 kol) ïa ka Umpling SC.
Ka Ïaraplang Nongrum ka la ïoh ban khyrwit marwei haduh san kol na ka bynta ka Laitkor hadien ba ïoh thep ha ka minit kaba 2, 10, 20, 73 & 77, katba ïa kawei pat la pynbud da ka Nisilia Majaw (17).
Ha kane ka sngi sdang la ïadon lang ki dkhot ka Shillong Sports Association (SSA) kiba kynthup ïa u Secretary u Bah S.S Rapthap, kumjuh u Bah K.S Kurbah, Bah Prosper Warjri, Bah Cliff Nongrum, Bah Dipshon Lyngdoh Nongbri bad kiwei.
Ha kane ka lympung ki don haduh 12 tylli ki kynhun kiba la phiah ha ar tylli ki group. Ka Mawlai SC kaba dei ka lahduh jong u snem ba la dep, ka la shah kynthup ha ka Group-B ha kaba kan ïakhun pyrshah ïa ka Ïasnohktilang, Lumparing, Kharang, Synroplang bad ka Maw U-Tieng. Katba ha ka Group-A ki kynthup ïa ka Laitkor (kaba wan ba-ar ha u snem ba la dep), Umpling, PFR Football Academy, Mawkriah West, Kick Start Academy bad ka Lawei.
Ki ar tylli ki kynhun ki ban wan ha ki kyrdan ba hakhlieh jong kine ki group kin ïoh rung sha ka semi final ka ban long ha ka 14 tarik u Naitung.
Ka jingïakhun ha ka sngi Ba-ar kan long hapdeng ka Lumparing SC pyrshah ïa ka Kharang SC ha ka por 2:30 noh phai sngi, katba ka Mawlai SC ïa ka Ïasnohktilang FC ha ka por 4:15 janmiet.
