Shillong, Jylliew 19:
Ka Dani Carvajal u la lah ban pynurlong ïa ka Spain ban khur ïa ka nam lahduh ha ka Nations League. Kane ka wan urlong hadien ba pynliem noh ïa ka Croatia lyngba ka tie-breaker da 5-4 kol ha ka Lah Sngi U Blei ha De Kuip kaba ha Rotterdam, Netherlands.
Ha kane ka jingïakhun final baroh ar kynhun kim shym la lah ban thep haduh kaba kut ka jingïalehkai wat hadien ba ai por shaduh ka extra time. Ha kane ka jingïalehkai u rangapkol ka Spain u Unai Simon u la lah ban khanglad ïa ki kol ba la shut da u Lovro Mayer bad u Bruno Petkovic ha ka tia-breaker, hashwa ba u Carvajal u lah ban pynurlong ïa ka Spain ban khur ïa ka nam lahduh ha ka sien kaba nyngkong naduh ka Euro 2012 bad ban pynkut syndon ïa ka Croatia.
Ka Croatia hapoh ka jingïalam u Zlatko Dalic kaba la wan ha ka kyrdan ba-ar ha ka World Cup 2018 bad ba lai ha u 2022, kam pat ju ïoh ban khur ïa ka trophy. Kumta ka la khmih lynti ban pynurlong ha kane ka kynti ha ka Nations League bad ruh kan dei ka kabu ksiar na ka bynta u kapten u Luka Modric, uba la ïalehkai haduh 166 sien ha ki jingïalehkai shabar ri.
Da kane ka jingjop ka la nang ai mynsiem ïa utei u coach ba thymmai ka Spain u Luis de la Fuente hadien ba u la shah kynthoh ha u ’nai Lber hadien ka jingshah rem ha ka Scotland ha ka lympung ïaknieh rung jong ka Euro 2024 (qualifying). Kane ka long ruh ka jingwanphai hadien ka jingshah rem ha ka France ha ka final jong u 2021.
“Na ka bynta jong ngi ka long kaba biang eh ngim shym la lah ban pynurlong ha ka World Cup kaba la long ha Qatar, hynrei mynta ka sngi ki la lah ban pynurlong,” la pynpaw u rangïalehkai ‘dien ka Real Madrid u Carvajal.
“Ngi don ka jingkyrmen kaba skhem ha ka tie-breaker bad ngi la lah ban pynurlong. Nga tip ba ngi hap ban shut ïa ka tie-breaker bad kane ka la urlong ha ka wat kaba hynriew,” u la bynrap.
Kham hashwa na ka liang u Dalic u la pynpaw ba ki don haduh 25,000 ngut ki paidbah nongshong shnong na Croatia ki la khmih lynti ban leit sha Rotterdam na ka bynta ban pyndap ïa ka stadium hi baroh kawei, hynrei kane kam shym la urlong bad ka long ka jingkmen ïa ki nongkyrshan ka Spain.
