Jakarta, Jylliew:
U nongialehkai Badminton na ka ri Denmark uba dang iai bat kum u lahduh ha ka pyrthei u Viktor Axelsen, sa shisien biang pat u lah khur noh shalade ia ka jingjop kaba lai sien lynter na ka lympung ialehkai kaba mynta ka Indonesia Open, hadien ba u tei u rangialehkai u la lah ban jop pyrshah ia u Anthony Sinisuka Ginting ha baroh shi lynter jong ki jingiakhun.
Ha kata ka jingiakhun, u Viktor u lah iai bteng shuh shuh ia ka jingpyniaid ka jong u ha ka jingialehkai lyngba ki ace tad haduh ba un da lah ban pynliem noh syndon ia utei u rangialehkai na katei ka ri da 21-14, 21-13 ha ka jngiakhun phainal kaba lah neh haduh 47min. naduh kaba sdang jong ka jingialehkai, u Axelsen u lah ioh ban pyniaid ia ka jingalehkai baroh kawei haduh kaba kut ha kaba um shym la ailad ia u rangiakhun pyrshah ban jam shakhmat ha ka jingiaknieh khur dor-thong.
Ka long ruh ka sien kaba nyngkong jong ka jingiakhun paramarwei ha ka jingiaknieh rah ia ka khusnam hadien ba ka jingshitom kaba lah ban ia u Viktor ka pynlong ruh ia u ban un hap kynrdan-dien noh na ka Singapore Open bad weng ruh ka jingshimbynta na ka Sudirman Cup.
Na ka jingiakhun phainal jong ki kynthei ha ka jingiakhun paramarwei, ka nongialehkai na China ka Chen Yu Fei ka la lah ban jop pyrshah ia ka nongialehkai na Spain ka Carolina Marin ha ka jingiakhun kaba jwat hapdeng jong ki kaba lah neh haduh 64 min tad haduh ba ka Chen kan da lah ban pynioh sha ka ri jong ka ia ka trophy jingjop na ka lympung.
Ha ka jingiakhun ki arngut, ka Chen ka lah khur shalade ia ka jingjop ha ka jingialehkai ba nyngkong da 21-18; ha shuwa ba ka Marin kan jan sha ka jingpyniakhaid dor-thong ha ka jingialehkai da kaba tam jingjop shakhmat da shi dorthong kata da 19-18 ha ka jingiakhun kaba ar. Hynrei ka nongiakhun pyrshah jong ka, ka la lah ban knieh noh shalade ia ki 3 dor-thong ba hadien na ka bynta ban khur shalade ia ka jingjop.
