Spain, Jylliew:
Ka long ka khubor kaba lah pynkmen shibun ia ki paid nongkyrshan ba shitrhem jong ka klob ialehkai phutbol na Spain ka Real Madrid, ha kaba katei ka klob ialehkai jong ka lympung Spanish La Liga ka pynbna mynta ia ka jingwanpoi jong u rangialehkai bar-ri ka Spain u Joselu da kaba shu shim-wa ia na ka klob Espanyol na ka bynta ban pynmih madan ha ka aiom ialehkai ka ban wan jong ka lympung.
Kumba ka long mynta, ha ka aiom ialehkai kaba mynta u Joselu u lah pyndep ia ka jingiaid lynti ha katei ka lympung kum uba lai ha ka jinglah ban kamai bun kol kata da 16 kol; watla ka kynhun ialehkai ka jong u ka Espanyol kaba don mynta ha ka kyrdan jong ka jingma bad kaba lah ruh ban shah sloit noh na ka lympung ialehkai, ka pynlong ia u ban shah khot biang mynta na ka kynhun ialehkai phutbol ka ri jong u nak ab ynta ka jingiakhun semifinal ha ka Nations League.
Shuh shuh ka khubor kaba lah mih ka iathuh ruh ba ka Real Madrid bad Espanyol ki lah mynjur mynta ia ka jingiateh hapdeng jong ki na ka bynta utei u rangialehkai; ha kaba un sa iasnohlang noh pura bad katei ka kynhun ialehkai ba paw na Spain ha ka aiom ialehkai ka ban wan ha ryngkat bad kiwei pat ki kyndon ba ka klob Real Madrid ka lah ban thied-duh syndon ia u ha kaba kut jong ka jingiateh.
Kum u rangshutbol ba kynsai jong ka Spain, utei u rangialehkai ba 33 snem uba ju ialehkai shakhmat, u la lah ban kamai ia ki 3 kol na ki saw sien ialehkai ki jong u na ka Spain.
Shuh shuh ruh u Karim Benzema, Eden Hazard, Marco Asensio bad Mariano Diaz kumba ka paw mynta ka long ba ki lah mih noh na Madrid bad ieh ha ki nongpyniaid ki jong ka na ka bynta ka jingpynthymmai noh ia ka kynhun ialehkai baroh kawei. U Joselu uba lah dep ban ialehkai na ki 10 tylli ki klob ialehkai na Spain, Germany bad England u lah dep teng ban ialehkai ruh na ka ‘B’ Team jong ka Real Madrid bad don ia ka kawei ka jingialehkai kaba u lah ioh ban mih madan na ka klob Real Madrid ha ka La Liga kata ha ka aiom ialehkai 2010-11.
