China, Jylliew:
Ka nongialehkai Olympic na ka ri ha ka jingialehkai Fencing ka C A Bhavani Devi, mynta ka kynti ka la lah ban thaw ruh ia ka khana-pateng na ka bynta ka ri baroh kawei da kaba khur ia ka takma ba nyngkongeh na ka bynta ka ri ka takma Rnong hadien ka jingshah rem jong ka ha ka jingiakhun semifinal jong ka rynsan iakhun Sabre ki kynthei ha ka lympung ialehkai ba mynta ka Asian Fencing Championships ha Wuxi.
Ha kaba iadei bad katei ka bynta jong ka jingshah rem noh ka jong ka, ka khubor ka iathuh ba ka Bhavani ka lah shah pynliem noh ha ka nongiakhun pyrshah kaba na Uzbekistan ka Zaynab Dayibekova ha ka jingiakhun kaba tyngeh ba ka lah hap ban mad ha ka tei ka rynsan iakhun da 14-15, hynrei kaba lah pynthikna ruh sha ka ri ia kata ka takma kaba lai na katei ka lympung ialehkai. Kham hashuwa, ka Bhavani ka la lah ban pynliem noh ia ka nongialehkai kaba bat kum ka lahduh ha ka pyrthei ka Misaki Emura na Japan da 15-10 ha ka rynsan iakhun quarterfinal. Shuh shuh ruh ka Misaki ka long ka nongialehkai kaba la lah khur shalade ia ka takma Ksiar na ka rynsan Sabre ha ka 2022 World Fencing Championships kaba lah long Cairo. Kumta ka tei ka jingjop jong ka Bhavani pyrshah ia ka Misaki ka long ruh ka sien kaba nyngkong ba ka lah khur shalade ha kaba ka lah dep ban shah rem noh ha baroh ki jingialehkai ba lah dep ki jong ka pyrshah ia katei ka nongialehkai na Japan. Ha ka tei ka lympung ialehkai ba mynta, ka Bhavani ka lah ioh da ka ‘bye’ ha ka Round of 64 ha shuwa ba kan pynliem noh ia ka Dospay Karina na Kazakhstan ha kawei pat ka kylla iakhun. Hadien kata, ka Bhavani ka lah pynliem ruh sa ia ka Ozaki Seri da 15-11 ha ka jingiakhun pre-quarterfinal ka jong ki.
