Bengaluru, Jylliew:
Katkum ka khubor ba lah ioh lum ka iathuh ba na ka liang jong ka kynhun ialehkai Kriket ka Pakistan ka pynpaw ia ka jingbym sngewsuk bad sngew shngain ban ialehkai katto katne ki jingialehkai bad ki katto katne ki kynhun ialehkai ki ban wan shimbynta ha ki madan ialehkai ba lah buh ban pynlong ia ki jing-ialehkai jong ka lympung ODIs World Cup mynta u snem ka ban sa long ha India; kata ki jing-ialehkai kaba kynthup ia ka jingiakhun bad ka Afghanistan ha Chennai bad ka jing-iakhun bad ka Australia ha Bengaluru.
Shuh shuh ruh ka khubor ka iathuh ba ka jingiakhun jong ka PCB halor ka jingialeh ban pynlong ia ki katto katne ki jingialehkai jong ka Asia Cup da ka’ Hybrid Model’ ka lah poi sha kaba kut noh. Hynrei ia mynta ka kynhun ialehkai jong katei ka synjuk ka khmih lynti ban wan ialehkai sha India na ka bynta katei kawei pat ka lympung iakhun ka ban sa long naduh u Risaw haduh u Naiwieng. Kumta ruh ka jingiai ap kaba baroh shi katta na ka bynta ka jingiakhun hapdeng ka India bad Pakistan khlem pep kan sa long ha ka madan ialehkai kaba ha Ahmedabad ha ka 15 tarik u Risaw 2023.
Kumta ha shuwa ban pynbna ia ka prokram ialehkai bapura jong ka tei ka lympung ban long ha India, na ka liang jong ka International Cricket Council (ICC) ka lah kylli na ki dkhot jong ki synjuk kynthup ia ki dkhot jong ka Pakistan Cricket Board (PCB) halor ka jing-ai jingmut ha kaba iadei bad katei ka bynta jong ka lympung.
Hynrei kiwei pat ki khubor ki iathuh ba katkum ka jingkhein jingdiah jong ka Board, kumjuh ruh na ka kynhun ki riew shemphang ki lah ai ia ka thong ha kaba iadei bad ka jingmynjur ia ki madan ialehkai ha kaba ka ICC bad ka BCCI ki lah dep ban pynbeit ha kaba iadei bad ki jingialehkai 50 over jong ka Pakistan ha katei ka lympung ialehkai ka ban sa long.
Ka kynhun ialehkai jong ka Pakistan ka ban ialehkai bad ka Afghanistan ha ka madan ialehkai kaba ha Chennai kaba biang eh na ka bynta ki rangkawang bol spin, ka thew ruh ba katei ka kynhun ialehkai ka lah ban iakynduh bad ki rangkawang bol ka Afghan kiba tbit kum u Rashid Khan bad Noor Ahmad kiba lah ialehkai bha ha ka kynhun ialehkai IPL ka Gujarat Titans ha une u snem ba mynta.
Katba ka jinglong jingman jong ka madan ialehkai ha Bengaluru ka long kaba iajan bha ha kaba iadei bad ka kam tied bad ka long ruh kaba eh ban sngewthuh ba kaei kaba lah pynlong ia ka Pakistan ba kan don ia kata ka bhah lypa ha ka na ka bynta ban ialehkai bad ka Australia ha Chinnaswamy Stadium.
Hynrei ka tyllong khubor na ka PCB ka bthah sha ka kynhun jied, kaba long ruh ka shi bynta jong ka shnat ha ka ban pyniaid ia ki kam ki jam jong ka kynhun da ka jingai jingmut sha ka synjuk ban ym pdiang ia ka madan ialehkai kaba ha Chennai kum ka madan iakhun na ka bynta ka kynhun pyrshah ia ka Afghanistan naba ka long ka madan ialehkai kaba biang tam eh bad kaba iajan paralok bha bad ki nongkawang bol spin, hynrei ym pat na ka bynta kiwei pat ki bynta jong ka jingiakawang bol kynthup kiba tied.
Dang ha u bnai ba lah dep, ka PCB ka pynbna ia ka saindur ba thymmai jong ka komiti jied nong-ialehkai ba thymmai ha kaba ha ka sien kaba nyng-kongeh ka don ia u Secretary, Manager Analytics bad ka shnat treikam ka ban pynkhlain ia ka kynhun na ka bynta ka kynhun ialehkai jong ka ri Pakistan kata u Hassan Cheema ia kaba lah kynthuplang ruh mynta ia u Mickey Arthur bad ia u nongpyniaid bahakhliehduh jong ka kynhun u Grant Bradburn.
Ha kaba iadei bad ka jingiaid lynti sha katei ka lympung ialehkai World Cup ka ban sa long ha India, ka kynhun ialehkai na Pakistan ha kaba nyngkong eh kan hap ban iakhun ia ki ar tylli ki jingialehkai na ka bynta ka jingshah jied sha ka lympung. Kita ki jingialehkai lah dep ruh ban pynbeit ban pynlong ha ka 6 &12 tarik u Risaw ha Hyderabad. Nalor kata, la iathuh ruh ba kiwei pat ki madan ialehkai ba katei ka kynhun ka khmih lynti ban ioh ialehkai ka long ka madan ialehkai ha Chennai, Kolkata, Bengalur bad Ahmedabad.
