Taipei, Jylliew:
Ka jingkut noh ka jingiaid lynti jong u HS Prannoy ha ka rynsan iakhun semifinal jong ka Indonesia Open ka long ka kam kaba utei u nong-ialehkai u hap ban iehnoh shadien ia ka naba mynta utei u rang-ialehkai un hap ban ialeh pat na ka bynta ban rah shuh shuh kham shajrong ia la ka rukom ialehkai ynda un ialam ia ka kynhun ialehkai ka ri sha kawei pat ka lympung ialehkai ka ban sa sdang naduh mynta ka sngi (Ba-Ar) ka Taipei Open.
Shuh shuh ruh utei u rangialehkai uba bat ia ka kyrdan balai ha katei ka lympung bad u ban sa shim ia ka bynta jong ka rynsan iaknieh rung ha ka jingiakhun sdang jong ka jingiakhun paramarwei jong ka BWF World Tour Super 300. Kumjuh ruh u Prannoy; uba lah khur ia ka jingjop ha ka Malaysia Masters Super 300 dang ha u bnai ba lah dep, u lah ialehkai bha ha ka lympung ba dang shu dep long da kaba jam shaduh ka jingiakhun semifinal hynrei uba lah shah rem noh da 15-21 15-21 ha u Viktor Axelsen ka Denmark. Kumta ruh kiwei pat ki rangiakhun paramawei ka ri ha ka tei ka lympung ialehkai ka ban long mynta ki long u Meiraba Luwang Maisnam u ban iakhun pyrshah ia u Angus Ng Ka Long na Hong Kong, Kiran George, Sathish Kumar Karunakaran, Mithun Manjunath bad S Sankar Muthusamy Subramanian ha kaba u Subhankar Dey bad Parupalli Kashyap kin hap ban iaid lyngba sha ka lympung da ka jingia aireng jong ki ha ka rynsan iaknieh rung. Kumjuh ruh kiwei pat ki nongialehkai ba paw napdeng ki shynrang ha ka lympung ki long u nongialehkai na Chinese Taipei u Chou Tien Chen (2nd) bad Kenta Nishimoto (4th).
Ka khubor ka iathuh ruh ba ka Saina Nehwal kan ialeh mynta ha katei ka lympung na ka bynta ban pynkhie-im ia ka rukom ialehkai ka jong ka ha ka rynsan iakhun paramarwei ryngkatlang bad ka Malvika Bansod, Aakarshi Kashyap bad Ruthvika Shivani Gadde, ha kaba ka Saina ha kaba sdang jong ka jingiakhun kan hap ban iakhun shuwa bad ka nongialehkai na Thailand ka Pornpicha Choeikeewong katba ka Malvika kan iakynduh bad ka Beiwen Zhang. Ha ka kyrdan iakhun mar arngut ki shynrang, u Satwiksairaj Rankireddy & Chirag Shetty kiba la lah ban thaw khana-pateng ha ka lympung ba dang shu dep long ha Jakarta da kaba rah ia ka nam lahduh, kin ym shim bynta ha katei ka lympung ialehkai ba mynta bad ha ka jingbym shym la snohktilang ka jong ki bad ka kynhun ialehkai ka ri ha ka lympung, u Krishna Prasad Garaga & Vishnuvardhan Goud Panjala kin ialam nakhmat ia ka kynhun iakhun mar arngut ki shynrang ka ri ha ka lympung bad ki ban sa sdang ia ka jingiaid lynti ba nyngkong pyrshah ia u Vinson Chiu & Joshua Yuan na USA.
Ha ka jingiakhun jong ki kynthei, ka Rutuparna Panda & Swetaparna Panda ki long tang ma ki ki ban mihkhmat ia ka ri na ka kyrdan iakhun mar arngut ki kynthei ha katei ka lympung ialehkai; katba u Rohan Kapoor & ka N Sikki Redd bad u Navaneeth Bokka & ka Priya Konjengbam kin mihkhmat ia ka ri sha ka lympung na ka kyrdan ialehkai ba mar shijur.
Katkum ka khubor ba lah ioh lum ka iathuh ba ka BWF World Tour la phiah ha ki hynriew kyrdan; kata World Tour Finals, 4 tylli ki Super 1000, 6 tylli ki Super 750,7 tylli ki Super 500, bad 11 tylli ki Super 300.
