Shillong, Jylliew 22:
Ka Laitkor SC bad ka PFR Academy ki la bteng ïa ka jingjop kaba ar ha ka lympung ïalehkai Women’s League ba la pynïaid da ka Shillong Sports Association ha ka sngi palei ha madan MFA kaba ha Third Ground, Polo.
Ha kane ka jingïakhun kaba ar jong ka Group-A, ka Laitkor SC ka la pynjem khnap sa ïa ka Mawkriah West SC da 16-0 kol. Ka Nisilia Majaw ka la khur haduh ar tylli ki hat-trick bad ka Ïaraplang Nongrum ka la thep san kol.
Wat la ka Laitkor ka la lah ban pynliem ïa ka Umpling SC da 6-0 kol, hynrei ha kane ka jingïakhun kaba ar katei ka kynhun kaba wan ba-ar ha u snem ba la dep, ka la nang pynjanai shuh shuh ha ka ban thep kol kat haduh ba ka la jan kynjoh shaduh ki lai dorjon.
Ka Nisilia Majaw kaba la khur ïa ar tylli ki hat-trick, ka la ïoh ban thep ha ka minit kaba 35, 41, 42, 59, 63 & 64. Kumjuh ka Ïaraplang Nongrum ka la ïoh ban thep san kol ha ka minit kaba 25, 68, 69, 70 & 70+2. Ka Tracy Rympei ka la khur ïa ka hat-trick hadien ba ka ïoh ban thep lai kol (10, 19 & 29), katba ïa ki shi kol la thep da ka Ïawanlang Nongbet (22) bad ka Ibakordor Wahlang (34).
Haduh kaba kut jong ka jingïalehkai ka Mawkriah kam shym lah ban pynphai wat tang shi kol bad ka la mad ïa ka jingshah rem ba ar ha kane ka lympung.
Haba phai sha ka jingïakhun ba ar, ka PFR Academy ka la pynliem noh ïa ka Umpling SC da 7-0 kol. Kane ka long ka jingjop ba ar ïa ka PFR. Ha ka jingïalehkai ba la dep, ka la jop da 16-0 kol ïa ka Mawkriah West.
Ka J. Lyngdoh ka la khur ïa ka hat-trick hadien ba ïoh thep ha ka minit kaba 20, 25 & 46. Kumjuh ka B. Kharsyntiew (19 & 70) ka la ïoh ban thep ar kol bad ïa ka shi kol la thep da ka D. Khongwet (21) bad ka R. Suting (51).
Kumba ka paw ka PFR bad ka Laitkor ki dei ki kynhun kiba la lah ban thep palat ar phew kol tang ha ki ar tylli ki jingïalehkai. Ka PFR ka la lah ban thep haduh 23 kol bad ka Laitkor ka la thep 22 kol.
Ki jingïalehkai ha ka Group-B ha ka sngi Thohdieng kin long hapdeng ka Mawlai SC pyrshah ïa ka Kharang SC ha ka por 2:30 noh phai sngi bad ka Ïasnohktilang FC pyrshah ïa ka Lumparing SC ha ka por 4:15 janmiet.
