Nongstoiñ, Jylliew 22:
Ka Federation of Khasi Jaiñtia & Garo People (FKJGP) Nongstoiñ Circle ha ka sngi Palei ka la leit ïakynduh ïa ka District Sports Officer (DSO) West Khasi Hills ka Kong Balarina Syiem ban pan jingshai halor kitei ki kynrum-kynram kiba la mih ha kaba ïadei bad ka jingbymhun halor ka jingjurip rta (screening) ïa ki khynnah ki ban ïashim bynta ha ka lympung ïalehkai District Level Subroto Mukherjee Football Cup.
Ïa kane lympung la thmu ban sdang naduh 26 tarik mynta u bnai kaba la phiah sha ki lai tylli ki kyrdan ïalehkai, kita ka Under-14 jong ki khynnah shynrang bad ka Under-17 jong ki khynnah shynrang bad kynthei.
Haba ïakren bad ki nongthoh khubor, kitei ki dkhot ka FKJGP ki la ïathuh ba ka DSO ka la kubur ba ka jingshim por haduh ban da miet ban pyndep ïa ka jingjurip rta namar ka jingbun ki skul kiba wan shim bynta kiba la don haduh 37 tylli baroh ki skul na WKHD.
Ki la ïathuh ba ki la hap ban pyndep beit bad lada ym lah ban pyndep kan sa ktah pat ïa ki skul kiba lehse kin nym lah shuh ban phah wan biang ïa ki khynnah ha kawei pat ka sngi.
Halor ki jingkynnoh leh shiliang khmat ïa ki skul, ka DSO ka la kyntait ba kam shym la don kum kata namar ba ïa ka jingjurip rta la pyrkhing bha khnang ba kan ym don ka jingleh tuh na ki khynnah bad ba ki hap ban wanrah lang ïa ki kot ki sla ban pynshisha ïa ka snem kha bad kiba dei hok ki jong ki.
Namar kata, na ka liang ka seng ka la kyntu ïa ka DSO ba kan shim khia ban pynbeit ïa ki kynrum kynram khnang ban lah kyntiew ïa ki kam ïalehkai ha ka district. Ha kajuh ka por ka seng ka kyntu ruh ïa ki skul ba kin ym pynshlur ïa ki khynnah ban wanrah da ki syrnod sngi kha ki bym dei hok khnang ba kan long kaba ïaid beit ïaid ryntih.
