Shillong, Jylliew 22:
Ïa ka ilekshon jong ka Wrestling Federation of India la hap ban pynkynriah noh sha ka 11 tarik u Naitung hadien ba ka la don ka jingujor ha kaba ïadei bad ka jingpaw kyrteng u pyrsa kurim jong u president u Brij Bhushan Sharan Singh ha ka thup jong ki nongthep vote na ka bynta katei ka synjuk.
U pyrsa kurim jong u Singh, u Vishal Singh u dei u president jong ka Bihar Wrestling Association. Ki nongïalehkai ïalympat, kiba la pynlong ka jingïakhih naduh 23 tarik u Ïaïong hadien ba la don ka jingkynnoh ba u Singh u la jrong kti ïa ki ’thei ïalehkai kynthup ïa kiba dang khynnah, ki la pynthikna ba u Singh lane kiba haïing hasem ki lah ban ïadon kti ha ka ban pynthymmai ïa ki nongkitkam ha kane ka synjuk kaba thymmai.
Dangshen mynta u bnai ki nongïalympat kiba ïakhih pyrshah, ki la ïakynduh ïa u Myntri ka tnat ïalehkai u Anurag Thakur bad ki la rai ba ïa ka ilekshon jong ka synjuk dei ban pynlong ha ka 30 tarik mynta u bnai.
Hynrei ka ad-hoc committee ba la thung da ka Indian Olympics Association dangshen kaba la pynbna ba ïa ka ilekshon yn pynlong ha ka 6 tarik u Naitung, ka la rai ban pynkynriah noh sha ka 11 tarik u Naitung namar ka la don ka jingkynnoh ba ki don ki bahaïing jong utei u nongïalam ka synjuk, kiba la don ha ka thup kyrteng na ka bynta ka ilekshon ban jied ïa u nongïalam uba thymmai ha ka WFI.
Kumta na ka liang ki synjuk ïalehkai ïalympat na Maharashtra, Haryana, Telangana, Rajasthan bad Himachal Pradesh ki la kyntu ïa ka ad-hoc committee bad buh ruh ka jingkyrpad ba kin shah kynthup lang ha katei ka ilekshon. Ki la pynpaw ba u la shah weng khlem kano kano ka daw hapoh ka jingïalam u Singh.
Katto katne ki dkhot ki la kynthoh jur ba u bahaïing jong u Singh ki la ïoh lad ha ka jingthep vote namar ki la shah thung be-aiñ hapoh ki synjuk ïalehkai ka jylla Bihar.
Katei ka kynhun jong ki nongïalympat ka la sdang ban pynlong ka jingïakhun naduh u Kyllalyngkot mynta u snem. Hynrei katei ka kynhun hapoh ka jingïalam u Bajrang Punia, Vinesh Phogat bad ka Sakshi Malik ki la pynsangeh noh ïa ka jingshong kylllaiñ mungor hadien ba la pynbna ban pynlong ïa ka jingtohkit.
Hynrei ki nongïalympat ki la pynlong biang ka jingïakhih pyrshah hadien bym shym la pynbna paidbah ïa katei ka jingpynbna bad ruh ki la dawa ba dei ban kem ïa u. Kane ka kynhun ka la leit ujor ruh sha ka Ïingbishar jong ka Supreme Court hadien ba ki la dep mudui da ka ejahar pyrshah ïa u bad kitei ki nongïalympat ki la kam ba ki bor pulit ki la kyntait ban leh kumta.
Ha ka 15 tarik mynta u bnai, ki pulit ka nongbah Delhi ki la ujor pyrshah ïa u Brij Bhushan halor ka jingkyntait jong u ha kaba ïadei bad ka jingleh tohmet ïa ki nongïalehkai kynthei.
