Shillong, Jylliew 22:
Ka Lebanon bad ka Maldives ki la khur ïa ka jingjop kaba nyngkong ha ka SAFF Championship ha ka sngi palei.
Ha ka jingïakhun kaba nyngkong jong ka Group-B, ka Lebanon ka la lah ban pynliem noh ïa ka Bangladesh da 2-0 kol ha Sree Kanteerava Stadium kaba ha Bengaluru.
Wat la kine ki kynhun kim shym la lah ban thep kol ha ka kylla step, hynrei ka Lebanon ka la lah ban pynurlong na ka bynta ban ïoh pynkhih jar ha ka minit kaba 74 lyngba u Hassan Maatouk. Ïa kawei pat ka kol la pynbud ha shwa ban wai ka jingïalehkai lyngba u Khalil Bader na ka bynta ban khur ïa ki lai point kiba nyngkong na kane ka group.
Kumba ka paw ka Lebanon ka dei ka kynhun kaba la bat ïa ka kyrdan ba 99 ha ka pyrthei bad ka Bangladesh ka don ha ka kyrdan ba 192.
Haba phai sha kawei pat ka jingïakhun kaba ar, ka Maldives ka la lah ban pynliem noh ïa ka Bhutan da 2-0 kol. Tang mar ïasdang ka jingïalehkai ka Maldives ka la ïoh ban pynkhih jar nyngkong eh lyngba ka penalty ba la shut da u Hamza Mohamed ha ka minit kaba 6 bad ïa kawei pat ka la thep hashwa ban kut ka jingïalehkai lyngba u Naiz Hassan ha ka minit kaba 90.
Kham ha shwa ban wai artad ka jingïalehkai ka Maldives ka la duh noh ïa u rangïalehkai shapdeng Hassan Raif Ahmed uba la shah sei red card ha ka minit kaba 90+2. Kumta une u rangïalehkai un duh ïalehkai ha ka jingïakhun ka ban wan pyrshah ïa ka Bangladesh ha ka 25 tarik.
Kane ka lympung kan bteng biang ha ka 24 tarik ha kaba ka India kan ïakhun pyrshah ïa ka Nepal ha ka por 7:30 mynmiet bad ka Pakistan ïa ka Kuwait ha ka por 3:30 janmiet.
