Shillong, Jylliew 23:
U coach ka India u Igor Stimac un wanphai ban shimti biang ïa ka kynhun ïalehkai ka ri ha ka jingïakhun kaba lai pyrshah ïa ka Kuwait ka ban long ha ka sngi Ba-ar.
Kane ka wan hadien ba u la shah sei da ka red card ha ka jingïalehkai kaba nyngkong jong kane ka lympung pyrshah ïa ka Pakistan ha Bengaluru.
Kat kum ka jingpynpaw da u General Secretary ka South Asian Football Federation (SAFF) u Anwarul Huq, la ong ba ka jingleh u Stimac kam da dei eh ban pynjlan ïa ka jingshah sospon palat na kawei ka jingïalehkai. Ïa kane la dep ban phah sha ka Disciplinary Committee jong ka SAFF.
“Ïa u Stimac la sospon tang na ka bynta kawei ka jingïalehkai bad ym lah ban palat nalor kata,” u la pynpaw na Dhaka ha ka sngi Palei.
U la ong ba kat kum ka kaiphod ba la phah da ki rephri bad u match commissioner kiba la pynpaw halor katei ka jingjia kaba u Stimac u la shah beh na madan, hynrei la phah ruh ïa ka kaiphod sha ka Disciplinary Committee jong ka SAFF.
“Katei ka jingjia kam da dei eh ban phah sha ka Disciplinary Committee namar um shym la leh bakla.”
U Stimac kum u coach uba tbit bad uba la ïadon bynta teng ban pynlong ïa ka Croatia ban khur ïa ka takma rnong ha ka World Cup 1998, u la shah ujor ha u rangïalehkai ka Pakistan u Abdullah Iqbal, ha ka por ba u dang thmu ban kawang ïa ka bol. Kumta u la pyrshang ban bat ïa katei ka bol bad kane ka mih ka jingpyrshah na ki katto katne ki rangïalehkai ka Pakistan lem bad ki coach.
Hadien katei na ka liang u rephri u Prajwal Chhetri lem bad ki nongpynïaid ki la hap ban tuklar khnang ba kan ym mih kano-kano ka jingkulmar.
Lyngba kane ka jingshah sospon, u Stimac un ym lah ban ïadon bynta bad ka kynhun. Kumta u rangïalehkai ’dien barim ka ri u Mahesh Gawli un shimti ban pynïaid ïa kane ka kynhun ha ka jingïakhun pyrshah ïa ka Nepal ha ka sngi Saitjaiñ hashwa ba u Stimac un wanphai ban shimti ha ka jingïakhun pyrshah ïa ka Kuwait.
Ha kawei pat ka liang, hadien ba ka la khur ïa ka jingjop kaba nyngkong pyrshah ïa ka Pakistan da 4-0 kol, ka India ka la khmih lynti ban khur jingjop biang sa ïa ka Nepal khnang ban pyntikna ban ïoh rung sha ka semi final ha kane ka lympung.
Kum ban shu pynkynmaw, ha ka SAFF Championship 2021, ka India ka la khur jingjop pyrshah ïa ka Nepal da 3-0 kol. Ka India kaba dei ruh ka lahduh ha ka Intercontinental Cup ka la lah ban pynliem ïa ka Lebanon da 2-0 kol ha ka jingïakhun final kaba la long ha Odisha. Namar kata, kane ka kynhun ka khmih lynti ban pynpaw biang ïa ka jingkhlaiñ bor.
Ha kawei pat ka jingïakhun ba la dep, ka Nepal ka la shah rem da 1-3 ha ka Kuwait. Kumta ka donkam ban ïalehkai bha khnang ban wanphai da ka jingjop.
