Shillong, Jylliew 28:
Ka Sacred Heart Boys HSS, Assam Rifles Public School, Ïewrynghep Secondary School bad ka Umphyrnai Presbyterian Secondary School ki la jam sha ka semi final ha ka U-14 jong ka lympung ïalehkai District Level Inter School Subroto Mukherjee Football Cup ba la pynïaid da ka shlem treikam jong u District Sports Officer (DSO), East Khasi Hills District.
Ha ka jingïakhun quarter final kaba la long ha ka sngi Balang ha madan Heh Mini Stadium kaba ha Mawlai Phudmuri, ka Sacred Heart Boys’ ka la pynliem noh ïa ka Tlongumiam SS lyngba ka tie-breaker da 4-2 kol.
Ha ka jingïakhun kine ki kynhun ki la ïakhaid mar 2-2 kol. Na ka Sacred Heart la thep da u Ïaisanlang Dohling (28) bad u Donklur Singh Teron (34), katba na ka Tlongumiam la thep da u Nangteiskhem Lyngdoh Mannai (54) bad u Elvenstar Pathaw (58).
Ka Ïewrynghep SS ka la lah ban pynliem noh ïa ka O. M. Roy Memorial H.S.S lyngba ka tie-breaker da 4-2 kol hadien ba kim shym la lah ban thep kol haduh kaba kut ka jingïalehkai.
Ka Assam Rifles ka la wanphai ban pynliem kylla ïa ka H. Elias Memorial HSS da 3-1 kol. Wat la ka H. Elias ka la ïoh ban pynkhih jar tang mar ïasdang ka jingïalehkai lyngba u Hamarbiang Jyrwa uba la shut ïa ka free-kick ha ka minit kaba 3, hynrei ka Assam Rifles ka la lah ban pynphai kylla haduh lai kol lyngba u Robindor Kyrsain (21), Thanggoulun Vaiphei (29) bad u V. Malsawmkima (30+4).
Ka Umphyrnai Presbyterian ka la pynliem noh ïa ka Umpohliew Jingtip HSS da 4-1 kol. U Ricky Kharkongor (31 & 47) u la ïoh ban thep ar kol, katba ïa ki shi kol la thep da u Vickyson Wankhar (11) bad u Bankitbok Mylliemngap (27). Na ka liang u Jopbor Kurbah (15) u la lah ban pynphai kylla shi kol.
Kitei ki saw tylli ki kynhun kin pynkhreh ïa ka jingïakhun semi final ha ka sngi Palei ha madan Heh Mini Stadium.
Haba phai sha ka Under-17 jong ki shynrang, ka Nongbsap SS bad ka Shillong College Higher Education ki la lah ban pyntikna ban jam sha ka quarter final.
Ha kane ka jingïalehkai kaba khatduh, ka Nongbsap ka la pynliem noh ïa ka Marius Rosina Memorial SS da 2-0 kol. Ïa kine kol la thep da u Nibarson Rapsang (1) bad u Miningstar Lyngdoh (37).
Katba ka Shillong College ka la pynliem noh ïa ka Rusa SS na Smit da 2-0 kol. Ïa kine kol la thep da u Dukiwakor-hi Satein (2) bad u Evening Tariang (14).
