Shillong, Jylliew 28:
Ka synjuk ïalehkai jong ka BCCI ka la shah kynthoh jur ha ki synjuk ïalehkai halor ka jingbym ailad ban pynlong ïa ki jingïalehkai na ka bynta ka ICC World Cup 2023, hadien ba la pynbna ha ka sngi Ba-ar ïa ka prokram ïalehkai ha Mumbai.
Ki shiphew tylli ki jaka ki ban pynlong ïa kane ka lympung ki kynthup ïa ka Ahmedabad, Bengaluru, Chennai, Dharamsala, Delhi, Hyderabad, Kolkata, Lucknow, Mumbai bad ka Pune. Kine kin ïoh ban pynlong ïa 48 tylli ki jingïalehkai jong ka ODI World Cup ka ban sdang naduh 5 tarik u Risaw haduh 19 tarik u Naiwieng mynta u snem.
Ka Trivandrum bad ka Guwahati kin ïoh ban pynlong ïa ki jingïalehkai kilanmet, katba katto katne ki jaka kum ka Mohali, Indore, Rajkot, Ranchi bad ka Nagpur kim shym la ïoh ban pynlong..
Ka stadium kaba ha Mohali ka dei kaba la ïoh ban pynlong ïa ki jingïalehkai kiba kongsan jong ka World Cup naduh u snem 1996, ka la long kawei kaba la shah pynduh. Na ka liang u Myntri ka tnat ïalehkai jong ka sorkar Punjab u Meet Hayer u la kynthoh jur ïa ka BCCI halor ka jingshah kyntait ka Mohali ban pynlong ïa ka World Cup.
Na ka liang u vice president ka BCCI u Rajeev Shukla u la pynshai halor kane ka bynta da kaba ong, “Ka jingbym pynrung ïa ka Mohali Stadium kaba ha Punjab na ka thup jong ki nongbah ki ban ïoh pynlong ïa kane ka lympung ka dei na ka daw ka jingtuklar ki seng saiñ pyrthei.”
“Ka sorkar Punjab kan sa rah ïa kane ka mat bad ka BCCI,” la ong u Hayer.
“Kumba ka long mynta ka Mohali kam pat long kaba biang kat kum ki jingbthah jong ka ICC bad dei na kane ka daw ba ka la shah kyntait ban pynlong ïa ki jingïalehkai.”
“Ïa ka jingïalehkai Test kaba 100 sien jong u Virat Kohli la pynlong ha Mohali. Ka Mullanpur Stadium ka la long kaba biang ha Mohali. Ka stadium ha Mohali kam pat long kaba biang kat kum ka jingbthah da ka ICC. Ha Trivandrum la ailad ban pynlong ïa ki jingïalehkai kilanmet ha ka sien kaba nyngkong eh. Ka jingjied ïa ki Stadium ka long kat kum ka jingbishar bniah bad wat ka jingïalehkai jong ka North East Zone kaba ha Guwahati,” u la bynrap.
U Shukla u la ong ba ka long ka sien kaba nyngkong eh ba la jied ïa ki 12 tylli ki jaka ban ïoh pynlong na ka bynta ka World Cup. “Kham hashwa kine ki jaka kim shym la shah jied ban pynlong ia ki jingïalehkai World Cup. Napdeng kine ki 12 tylli ki jaka, ïa ka jingïalehkai kilanmet yn pynlong ha Trivandrum bad Guwahati, katba kiwei pat kin ïoh ban pynlong ïa ki lympung ïalehkai. La ailad lut ïa baroh ki jaka ïalehkai. Na South Zone saw tylli ki jaka, na Central Zone kawei ka jaka, na West Zone ar tylli ki jaka, bad na North Zone ar tylli ki jaka. Ka Delhi bad Dharamshala kin ïoh ban pynlong ïa ki jingïalehkai jong ka North Zone,” u la bynrap.
