Jowai, Jylliew 29:
Ka Kiang Nangbah Govt. HSS, Police Public Secondary School, Jowai Govt. U.P RMSA School, Lumpyrtuh Secondary School, Laishnong HS School bad H.K Singh Secondary School ki la buh jaka ïalade sha ka semi final jong ka lympung ïalehkai District Level Inter School Subroto Cup Football Tournament ba la pynïaid da ka shlem treikam u District Sports Officer West Jaiñtia Hills District.
Kane ka la wan hadien ba kine hynriew tylli ki skul ki la khur jingjop ha ka quarter final kaba la long ha madan Kiang Nangbah Stadium, Ladthadlaboh, Jowai ha ka Sngi Palei.
Ha ka jingïakhun kaba nyngkong jong ka Under-17 (Girls), ka Kiang Nangbah Govt. HS School ka la pynliem noh ïa ka Jaiñtia Secondary School da 4-0 kol. Ka Police Public Secondary School ka la pynliem ïa ka Achievers Secondary School lyngba ka tie-breaker da 3-1 kol. Ka Jowai Govt. UP RMSA School ka la pynliem ïa ka Ummulong Presbyterian HS School lyngba ka tie-breaker da 3-2 kol.
Haba phai sha ka Under-14 (Boys), ka Lumpyrtuh Secondary School ka la pynliem ïa ka North Liberty HS School da 1-0 kol. Ka Laishnong HS School ka la pynliem ïa ka Marian Hill HS School da 2-0 kol. Ka HK. Singh Memorial Secondary School ka la pynliem ïa ka Govt. Boys HS School lyngba ka tie-breaker da 4-2 kol.
