Lahore, Jylliew:
Ka ïingbishar jong ka Punjab Province ha Pakistan ka la rai pyniap ia uwei u nonghikai hadien ka jingdon kti ban leh khlem-akor bad ban pyniap ia 2 ngut ki khynnah shynrang ha ki por ba la leit.
U Tanvir Ahmad bad uwei pat u paralok jong u, ia uba la ithuh kum u Nauman, ki la ktah kti bad leh khlemakor ia uwei u khynnah 6 snem bad kumjuh ruh ia u hymen ba 10 snem jong u hapoh ka nongbah Okara, ha u Rymphang jong u snem 2021, katei ka nongbah ka don kumba 130 kilometre na Lahore.
Ha ka Sngi Ba-ar, ka nongbishar jong ka Additional District & Sessions, ka Syeda Shahzadi Najaf ka la rai pyniap ia u Amad, katba ia u Nauman pat la rai set patok baroh shi jingim namar ka jingleh pynkheiñ aiñ jongki ha ki por ba la leit.
Ha kajuh ka por ruh ka ïingbishar ka la daiñ kuna haduh PKR 1 Million (USD 3,500) ia ki baroh 2 ngut nalor jong kitei ki kyndon pynkheiñ aiñ bad ki rai ba ka la pynngat ia ki.
Ki pulit ki la pyntip ruh ba ka ïingbishar ka la pynngat kyndon ia ki baroh 2 ngut hadien ba la ioh ia ki sabut bad ki sakhi kiba pura halor ka jingleh pynkheiñ aiñ jongki ha utei u snem.
Hadien ba la tohkit bniah, kitei ki 2 ngut ki la phla ia ka jingshisha baroh bad ki la iathuh ruh ba ka jing pyniap jongki ia kitei ki khynnah ka long da kaba shu ksih haduh ba kin da dkut mynsiem namar ka jing sheptieng ioh kin leit iathuh ia kaba la jia baroh.
