SAFF Championship
Shillong, Jylliew 30:
Ka kynhun ki rangïalehkai ka ri kan pynkhreh ban ïakhun pyrshah ïa ka Lebanon ha ka sien kaba lai, ha ka semi final jong ka SAFF Championship 2023 ka ban long ha ka sngi Saitjaiñ ha Sree Kanteerava Stadium kaba ha Bengaluru.
Hadien ka jingïakhaid khlem don ba lah ban thep kol ha ka jingïalehkai group, ka India ka la khur ïa ka jingjop da 2-0 kol na ka bynta ban rah ïa ka nam lahduh ha ka Hero Intercontinental Cup kaba la long ha Bhubaneswar.
Kane ka kynhun jong u Igor Stimac ka la ïashim bynta ha ka SAFF Championship, ha kaba kane ka lympung ka long kaba nyngkong eh ba ka India ka la ïakynduh ïa ki kynhun kum ka Lebanon bad ka Kuwait.
Ka India kaba la wan ba-ar ha ka Group-A, hadien ba ka la shah tam da ka ‘goal difference’ ha ka Kuwait, ka la jop ia ka Pakistan da 4-0 kol bad ïa ka Nepal da 2-0 kol.
Hadien ka India ka la ïakhaid mar 1-1 kol pyrshah ïa ka Kuwait hadien ba u Anwar Ali u la kum thep bakla bad ban pynlong ïa ka kynhun jong u Stimac ban hiar sha ka kyrdan ba-ar.
Ha kawei pat ka liang ka Lebanon ka la jop ïa ka Maldives da 1-0 kol ha kaba kut jong ka jingïalehkai jong ka Group-B ha kaba ka la kamai 9 point. Kham hashwa ka Lebanon ka la jop ïa ka Bangladesh (2-0 kol) bad ïa ka Bhutan (4-1 kol).
U Stimac uba la shah rem da ka red card ha ka sien kaba ar ha kane ka lympung pyrshah ïa ka Kuwait, un hap shong shabar na ka kynhun ha kane ka jingïakhun semi final. Na ka liang u kapten u Sunil Chhetri u la pynthikna ba ka kynhun ka dangbiang hapoh ka jingpynïaid u assistant coach u Mahesh Gawali.
“Shibun ki jingpynkhreh hashwa ban sdang kane ka jingïakhun bad u Stimac un ïadon lang. Hooid ngi kwah ïa u nongïalam u ban ïasaid na ka bynta ka kynhun. Hynrei watla ngin duh ïa u ha kane ka jingïakhun, hynei ka jingdon lang u Gawali kan pynshangaiñ ïa ngi,” la ong u Chhetri.
U Gawali, uba la ïoh ban shimti ïa kane ka kynhun kaba la jop da 2-0 kol ia ka Nepal, u la khmih lynti ba kane ka kynhun kan ïai bteng biang ïa ka jingjop ha kane ka jingïakhun pyrshah ïa ka Lebanon ha Odisha. “Ki rangïalehkai ki la long ba la pynkhreh bha bad ki la pynleit jingmut bha ban ïakhun pyrshah ïa ka Lebanon. Ngin iai ïbteng ban ïalehkai kumjuh ha kane ka lympung,” la bynrap utei u rangïalehkai barim jong ka ri.
“Watla ki shem jingeh na ka daw ka jingpher ha ka suiñ bneng ha Bhubaneswar, hynrei ki la lah ban ïalehkai bha ha kane ka jaka. Kan long ka jingïalehkai kaba kham pher. Ka long ka kynhun kaba khlaiñ bor ha ka bynta kaba shakhmat. U rangïalehkai number hynñiew (captain Hassan Maatouk) u long u rangïalehkai ba don sap,” la ong u Gawali haba kylli shaphang ka Lebanon.
Ha kawei pat ka jingïakhun semi final ka ban long kham hashwa kan long hapdeng ka Kuwait pyrshah ïa ka Bangladesh.
