Mumbai, Jylliew:
U heh nongïalam jong ka seng Nationalist Congress Party (NCP) u Sharad Pawar ha ka sngi Palei u la ong ba sa kawei pat ka jingïalang jong ka kynhun ki seng ka liang pyrshah kan sa long ha Bengaluru ha ka 13 tarik bad 14 tarik, Naitung.
Kane ka jingpynbna ka wan hadien ba la dep ban pynlong ïa ka jingïalang kaba nyngkong jong ka kynhun ka liang pyrshah ha Patna ha ka 23 tarik, Jylliew. Kham ha shwa u President jong ka seng Congress u Mallikarjun Kharge u la ong ba ka jingïalang kaba bud kan sa long ha Shimla hynrei la rai ban sa pynlong ha Bengaluru. Kane ka jingïalang ka long shi bynta ban pynïatylli ïa ki kynhun ka liang pyrshah ban ïakhun pyrshah ïa ka seng BJP. Ha ka por ba la don ka jingïalang ha Patna, ki la don kumba 16 tylli ki seng ka liang pyrshah kiba la leit ban don bynta ha kaba ki la ïathir bha na ka bynta ban ïoh pynibor pyrshah ïa ka seng BJP ha ka jingïakhun ïa ka ilekshon Lok Sabha 2024.
