Shillong, Naitung 02:
Ka Assam Rifles Public School, Ïewrynghep Secon -dary School bad ka Umphyrnai Presbyterian HSS ki la khur ïa ka nam lahduh ha ka District Level Inter School Su-broto Mukherjee Cup Football ba la pynïaid da ka shlem treikam u District Sports Office (DSO) ka East Khasi Hills District.
Kine ki kynhun kin mihkhmat ïa ka district sha ka State Level Subroto Cup ka ban sa long shen ha kane ka nongbah.
Ha ka jingïakhun final jong ka Under-17 ki shynrang kaba la long ha ka 1 tarik u Naitung ha madan Third Ground Polo, ka Assam Rifles ka la pynliem noh ïa ka H. Elias Memorial HSS lyngba ka tie-breaker da 4-1 kol hadien ba kine ki kynhun kim shym la lah ban thep kol haduh kaba kut jong ka jingïalehkai.
Kumjuh ha ka final jong ka Under-17 ki kynthei, ka Ïewrynghep SS ka la pynliem noh ïa ka H. Elias Memorial HSS da 2-1 kol. Ïa kine la thep da ka Ibalari Nongrum (20 minit) bad ka Iaraplang Nong-rum (43 minit), katba ka Ridalin Suting (50 minit) ka lah ban pynphai shi kol na ka bynta ka H. Elias.
Katba ha ka jingïakhun final jong ka Under-14 ki shynrang, ka Umphyrnai Presbyterian ka la pynliem noh ïa ka Assam Rifles Public School lyngba ka tie-breaker da 4-2 kol.
Ïa ki khusnam sha kine ki kynhun la sam da u rangialehkai phutbol barim ka Jylla u Bah Ailad K. Kynta ha kaba la ïadon lang u DSO Bah O. Mawthoh, u Coach Bah Lekini Suting, ki Principal bad nonghikai jong ki skul.
