Jowai, Naitung 02:
Ka Kynjai Para I ka la rah ïa ka nam lahduh ka lympung Tiger Five Football Tournament ba la pynïaid da ka Chilliangraij Sports & Youth Affairs Commit-tee kaba long ha madan shnong ka Chilliangraij ha ka sSngi Saitjaiñ.
Kane ka wan urlong hadien ba ka lah pynliem ïa ka Rishot FC da 3-2 kol ha ka final. Ïa ki lai kol ka Kynjai Para la thep da u Deibor (29 minit), u Premrose (39 minit) bad u Kynsai (59 minit), katba ïa ki kol ka Rishot pat la thep da u Kevin (40 minit) bad u Tremiki (42 minit).
Da kane ka namjop, ka Kynjai Para-I FC kala ïoh rah ïa ka song pisa kaba long T.50 hajar bad ka trophy, ka Rishot pat kaba la shah rem ha ka final kala ïoh T.30 hajar bad ka trophy.
U Oliver Pale u la ïoh khur ïa ka khusnam top scorer na ka Oxford FC, Best Goal Keeper la ïoh da u Forlic Dkhar na ka Kynjai Para-I FC bad ka khusnam Best Player la ïoh da u Premrose na ka Kynjai Para-I FC.
U kongsan ha kane ka sngi dei u Bah Brightstar Chyrmang, MDC ha ka jingïadonlang u samla Treiborlang R Suchen, General Secretary ka JSU, ki ‘riew rangbah bad ki dkhot ka sports committee ka Chilliangraij Sports and Youth Affairs.
