Jowai, Naitung 02:
Ka Lumpyrtuh Secondary School bad ka HK Singh Memorial Secondary School ha ka kyrdan Under-14 Boys bad ka Govt. Boys HS School bad ka North Liberty HS School ha ka kyrdan Under-17 Boys ki la rung sha ka jingïakhun final jong ka lympung ïalehkai District Level Inter School Subroto Cup ba la pynïaid da ka ophis u District Sports Officer, (DSO), West Jaiñtia Hills District.
Kane ka la wan urlong hadien ba kine saw tylli ki skul ki la khur nam jop ha ka jingïakhun semi final kaba la long ha madan Kiang Nangbah Stadium, Ladthadlaboh ha ka sngi Saitjaiñ.
Ha ka jingïakhun semi final ha ka kyrdan Under14-Boys, ka Lumpyrtuh Secondary School ka la lah ban pynliem noh ïa ka Laishnong HS School da 3-1 kol kaba la wan lyngba ka jingshut tie-breaker katba ka HK Singh Memorial Secondary School pat ka la lah ban pynliem noh ïa ka RC Eve Secondary School da 4-3 kol kaba la wan hi lyngba ka jingshut tie-breaker.
Haba phai pat sha ka jingïakhun jong ka kyrdan Under-17 Boys, ka Govt. Boys HS School ka la pynliem noh ïa ka Sawlyngdoh HS School da 4-3 kol kaba la wan hi lyngba ka jingïashut tie-breaker katba ka North Liberty HS School pat ka la pynliem noh ïa ka Ummulong Presbyterian HS School da 2-0 kol.
Haba phai pat ha ka liang jong ki kynthei, ha ka kyrdan Under-17, ki artylli ki skul ki ban ïaknieh ïa ka nam lahduh ki long ka North Liberty HS School pyrshah ïa ka Kiang Nangbah.
Ka jingïakhun ïa ka final hapdeng jong kitei ki skul baroh ban knieh ïa ka nam lahduh kan long ha ka Lah Sngi U Blei.
