Shillong, Naitung 03:
Ka Laitkor SC bad ka PFR Football Academy ki la bteng ïa ka jingjop kaba lai ha ka lympung ïalehkai Women Football League 2023 ba la pynïaid da ka Shillong Sports Association (SSA).
Kine baroh ar tylli ki kynhun ki dei kiba lah ban thep kol bun tam na baroh ki kynhun kiba la wan ïashim bynta ha kane ka lympung ryngkat ban kamai mar 9 dor-thong (point) na ki lai sien ïakhun. Haduh kane ka sngi, ka Laitkor ka la bat ïa ka kyrdan ba hakhlieh jong kane ka group da kaba lah thep haduh 29 kol, katba ka PFR ka la wan ba-ar da kaba thep 27 kol bad shah thep shi kol.
Ha ka jingïakhun jong ka Group-A kaba la long ha ka Lah Sngi U Blei ha madan Third Ground, Polo, ka Laitkor SC ka la pynliem noh ïa ka Kick Start Football Coaching Centre haduh 7-0 kol.
Ka Ïaraplang Nongrum (30 & 40) bad ka Ïahunlang Nongbet (47 & 57) ki la ïoh ban thep mar ar kol, katba ïa ki shi kol la thep da ka Iawanlang Nongbet- (2), Nisilia Majaw (7) bad ka Tracy Rympei (13).
Haba phai sha kawei pat ka jingïakhun kaba ar, ka PFR Football Academy ka la jop da 4-1 kol pyrshah ïa ka Lawei Smit SC.
Ha kane ka jingïakhun, ki ’thei ïalehkai ka PFR ki la pyrshang ban ïakhun tyngeh naduh kaba sdang da kaba ïoh ban pynkhih jar nyngkong eh lyngba ka Betshiba Syntiew ha ka minit kaba 10. Tang hapoh shiteng kynta kane ka kynhun ka la thep biang sa ar kol lyngba ka Ibashisha Khongwet (25 & 29) bad ïa ka kol kaba khatduh la thep da ka Ridalin Suting ha ka minit kaba 33.
Hashwa ban wai ka Lawei Smith ka la lah ban pynphai kylla shi kol lyngba ka B. Nongrum ha ka minit kaba 64 ha shwa ba kan mad ïa ka jingshah rem kaba nyngkong ha kane ka lympung.
Ka jingïalehkai jong ka Group-B ha ka Sngi Ba-ar kan long hapdeng ka lahduh jong u smem ba la lah, ka Mawlai SC pyrshah ïa ka Synroplang 77 ha ka por 2:30, katba ka Lumparing ïa ka Maw U-tieng ha ka por 4:15 janmiet.
