Shillong, Naitung 03:
Ka India kaba la bat ïa ka nam lahduh jong u snem ba la dep ka khmih lynti ban ïai bteng biang na ka bynta ban bat ïa ka rekod bad ban khur ïa ka nam jop kaba khyndai, ha kaba kan pynkhreh ïa ka jingïakhun final pyrshah ïa ka Kuwait ha ka SAFF Championship ka ban long ha ka sngi Ba-ar.
Wat la ka India ka la ïakynduh mawsiang ha ka jingïakhun semi final pyrshah ïa ka Lebanon, hynrei ka la lah ban pynurlong ban khur ïa ka jingjop lyngba ka tie-breaker da 4-2 kol. Kumjuh ka Kuwait ka la pynliem ïa ka Bangladesh ha ka jingai por (extra time) tam da 1-0 kol.
Kaba kham sngewtynnad hangne ka long ba kane kan dei ka sien ba-ar ba ka India kan ïakynduh biang ïa ka Kuwait ha kane ka lympung. Kham hashwa ha ka jingïalehkai jong ka Group-A, kine ki kynhun ki la ïakhaid mar 1-1 kol.
Ka lah ban don jingkyrmen ban ïalehkai hakhmat ki paidbah nongkyrshan ha la ïing ka ban long ha Kanteerava Stadium, hynrei kawei kaba pynkhuslai ïa ka India ka long halor ka jingthait ki rangïalehkai namar ka jingïai bteng ki jingïalehkai.
Haba pynpaw ha ki lad pathai khubor, u assistant coach kane ka kynhun ïalehkai ka ri u Mahesh Gawli u la pynpaw ba kum ka kynhun kam don jingkhuslai eiei.
Ha kane ka jingïakhun final, ka India ka lah ban khlaiñ lyngba ka jingwanphai u rangïalehkai ‘dien u Sandesh Jhingan. Une u rangïalehkai u la duh ban mih madan ha ka jingïakhun semi final pyrshah ïa ka Lebanon na ka daw ba u la ïoh jingsneng da ki yellow card ha ka jingïakhun pyrshah ïa ka Pakistan bad Kuwait.
U Anwar Ali u la mih bujli ha ka jaka u Jhingan pyrshah ïa ka Lebanon ha ka jingïakhun semi final bad u la lah ban ïalehkai bha ban ïashan tyngeh ïa ki rangïalehkai ka Lebanon.
U coach ka India u Igor Stimac un hap ban shong shabar na kane ka jingïalehkai na ka daw ka jingshah sospon ha ka disciplinary committee jong ka SAFF na ka bynta ki ar tylli ki jingïalehkai.
U Stimac u la shah sei ïa ka red card ba ar ha kane ka lympung ha ka jingïakhun pyrshah ïa ka Kuwait. Kham hashwa u la shah sei red card ha ka jingïakhun jong ka India pyrshah ïa ka Pakistan.
Kumta u Asst. Coach u Mahesh Gawli un shimti ban pynïaid ïa kane ka kynhun hapoh ka jingïalam u Sunil Chhetri kum u kapten na ka bynta ban ïakhun tyngeh ha kane ka jingïakhun kaba khatduh.
