Jowai, Naitung 03:
Ka North Liberty HS School ka la rah ïa ka nam lahduh ha ka Under-17, katba ka H.K Singh Memorial Secondary School ha ka Under-14 Boys jong ka lympung ïalehkai District Level Inter School Subroto Cup Football Tournament ba la pynïaid da ka shlem treikam u District Sports Officer, West Jaiñtia Hills District.
Kane ka la wan hadien ba kine ar tylli ki skul ki la jop ha ka jingïakhun final kaba la long ha madan Kiang Nangbah Stadium Ladthadlaboh Jowai ha ka Lah Sngi U Blei.
Haba phai sha ka jingïakhun, ka la long kaba shongshit ha kaba ki khynnah skul bad ki nonghikai jong ki skul kiba ïashim bynta ki la ïa tuid ban pyndap smam ïa ki sawdong jong ka madan Kiang Nangbah Stadium wat hapdeng ka jingsniew jong ka mariang.
Ka North Liberty HS School ka la long ka lahduh ha ki ar tylli ki kyrdan, kata ha ka Under-17 Girls hadien ba lah pynliem noh ïa ka Kiang Nangbah HS School da 2-0 kol.
Ha ka Under-17 Boys, ka North Liberty HS School ka la pynliem ïa ka Govt Boys HS School da 3-0 kol.
Ha ka Under-14 Boys, ka H.K. Singh Memorial Secondary School ka la pynliem ïa ka Lumpyrtuh Secondary School da 1-0 kol.
Da kane ka nam jop kine artylli ki skul kin mihkhmat ïa ka District sha ka State Level Football Tournament ka ban sa pynlong mynta u bnai da ka tnad Directorate of Sports & Youth Affairs ha ka nongbah Shillong.
Hadien ka jingïakhun la pynlong ïa ka jingïalang sam khusnam ha ka jingdonlang u kongsan u Additional Deputy Commissioner, West Jaiñtia Hills District u Bah Mark Andrew Challam, u District Sports Officer Bah Khroobok Passah, u Working President ka West Jaiñtia District Sports Association u Bah EMH. Passah, ki principal bad ki nonghikai bad kiwei kiba shah khot sngewbha.
