Shillong, Naitung 03:
Ki ’rangïalehkai ka Myngken Higher Secondary School bad ki ’thei ïalehkai ka Saiden Secondary School kin mihkhmat ïa ka Ri Bhoi District sha ka State Level Subroto Mukherjee Football Cup ka ban sa long shen ha ka nongbah Shillong.
Kane ka wan urlong hadien ba ki khur nam lahduh ha ka District Level Subroto Mukherjee Football Cup ba la pynïaid da ka shlem treikam u District Sports Officer (DSO) Ri Bhoi District.
Ha ka jingïakhun final jong ka Under-14 ki shynrang kaba la long ha madan Kurkalang ha Bhoi Rymbong, ka Myngken ka la pynliem noh ïa ka Umsning Presbyterian SS da 2-0 kol.
Haba phai sha ka Under-17 ki shynrang, ka Myngken ka la pynliem noh ïa ka Nongjri Presbyterian SS da 3-2 kol, katba ha ka liang ki kynthei (U-17) ka Saiden SS ka la jop da 1-0 kol ïa ka Myngken.
Ïa ka nam Best Player ha ka Under-14 la khur da u Prosperwell Ryntong bad Best Goalkeeper ka leit sha u Tainamiki Bina kiba na ka Myngken HSS.
Ïa ka nam Best Player ha ka Under-17 ki kynthei la khur da ka Eleen Kynta na ka Saiden SS bad Best Goalkeeper ka leit sha ka Ribancy Jamu na ka Sati Raja. Ha ka liang ki shynrang (U-17) ïa ka nam Best Player la khur da u Shilinstar Syngkli bad Best Goalkeeper ka leit sha u Pynshngenlang Shylla kiba na ka Myngken HSS.
Ïa ki khusnam sha ki nongjop la sam da ka DSEO Kong Paidalin Lyngdoh Nonglait kum ka kongsan ha kaba la ïadon lang ruh u Rinalkidon Lyngdoh Nonglait, u DSO ba la shongthait u Bah Hering Shangpliang kumjuh u DSO Bah Bobby L. Nongbet bad kiwei.
