Shillong, Naitung 04:
U Myntri ba dei khmih ia ka tnat Sports & Youth Affairs ka sorkar jylla u Bah Shakliar Warjri, ha ka sngi Ba-ar u la pyntip ba na ka liang u Myntri Rangbah ka jylla u Conrad K Sangma, u la bthah ban phah pyntbit na ka bynta lai snem ïa ki 9 ngut ki khynnah kiba la dep ban ïashim bynta ha ka STAR Talent Identification Program (STIP), ba la pynlong ïa ka da ka Meghalaya State Olympic Association bad ba la kyrshan pat da ka Directortate of Sports & Youth Affairs bad ïa kane ka kam ka dei kaba la pynïaid da ka Edge10 – Sportality.
Haba kren bad ki lad pathai ha kane ka sngi, nalor u Bah Shakliar la don lang u Working President ka MSOA Bah John F Kharshiing, nangta u Ian Campbell, u Olympian ba dei napoh ka ri Australia, Kong Isawanda Laloo IAS, Director Sports & Youth Affairs.
U Bah Shakliar u ïathuh ba ka jinglah ban ïoh ïa kine ki 9 ngut ki khynnah ka dei hadien ba ïa kane ka prokram la leit ha kaban pynlong ha baroh ki 12 tylli ki district ba don ha kane ka jylla, ha kaba ki khynnah ba la poi ban ïashim bynta ha kiba bun jait ki rukom jingpyrshang ki long haduh 14,500 ngut bad na kine haba la khmih bniah la pynhiar pat sha ka 200 ngut.
Na kine ki arspah ngut haba khmih ïa ka jinglah pat ka jong ki ban pyndep ïa ki jingpyrshang ba la buh ïa ki ba kin leh, la poi pat sha ka 172 bad na kine la ïoh ban jied 9 ngut ki khynnah kiban khreh ban jam ïa ka jingim ban ïoh pyntbit shuh shuh ïalade.
Haba ïadei bad kane, u Bah Shakliar u la ïathuh ba ma u kum u Myntri bad ha ka jingïakren bad u Myntri Rangbah, la shim ïa ka rai ba ïa kine ki 9 ngut ki khynnah mynta yn phah ïa ki ba kin leit sha ka prokram ban pyntbit janai ïa la ka jingim, kaba hangne, ka sorkar lyngba ka tnat sports kan khreh ba kan buria lut nadong shadong na ka bynta lai snem.
U Bah Shakliar u pynpaw ba da kane ka jingpynlut, u kyrmen ba ka jylla shisien ka sngi kan sa lah ba kan sei ïa ki rang ne ki thei ïalehkai kiban khreh ban kynjoh ïa ka jingim sha ka kyrdan ïalehkai jong ka international level.
Napdeng kine ki 9 ngut kiba la shah jied ban leit shah pyntbit, 6 ngut kin dei ha ka jingïalehkai jong ka athletic, 2 ngut ha ka weighlifting bad iwei ha ka jingïalehkai Karate.
