Shillong, Naitung 04:
U Myntri ba dei khmih ïa ka tnat Sports & Youth ASffairs u Bah Shakliar Warjri, ha ka sngi Ba-ar u la pyntip ba ki kam kiba ïadei bad ka jingpynthymmai ne pynitynnad shuh shuh ïa ka JN Stadium Polo, ka kam ba la lah ban pyndep tad haduh kane ka khyllipmat kaba myntya ka long kumba 70 na ka 100.
Ïa kane u Bah Shakliar u la pynpaw haba ïakren bad ki lad pathai khubor, ha kaba u la pynshai ba ka jingpynthymmai ne pynitynnad ïa ka JN Stadium ka don ar bynta, kawei ka dei ka intergrated sports complex bad sa kawei pat ka dei ka upgradation kaba don ka bynta ba nyngkong bad bynta kaba ar.
Ha ka bynta ba nyngkong, ka jingmang pisa ka long haduh T.39 klur na ka bynta ka bynta ba nyngkong bad sa T.20 klur na ka bynta kaba ar.
Haba ïadei pat bad ka jingtwa noh shi bynta ka kynroh kaba dang shu dep ban tei jong ka PA Sangma Stadium, u Bah Shakliar u ïathuh ba ka kaiphod tohkit jong kane ka dang ïaid shakhmat, nalor kata u la ïathuh ruh ba ïa ka kam jong kane ka stadium ym dei ba la pyntrei ne peit da ka tnat sports, hynrei la pyntrei ïa ka da kiwei, bad ha kajuh ka por u pynpaw ba hadien ka jingtwa ka kynroh, ka kam mynta ka la don pat sa hapoh ka ïingbishar hadien ka jingdon jong ka jingujor PIL.
