Shillong, Naitung 04:
Haduh lai ngut ki ‘thei ïalehkai ka Mawlai Sports Club ki la ïoh ban khyrwit ïa ka hat-trick, kaba la pynlong ïa ka Mawlai ban jop da 14-0 kol ha ka jingïalehkai pyrshah ïa ka Synroplang 77 ha ka Group B jong ka lympung Shillong Sports Asso-ciation’s Women’s League kaba la long ha ka sngi Ba-ar ha Third Ground, Polo.
Haba phai sha ka jingïa-lehkai, ka la long kaba noh bad khlaiñ shiliang, ha kaba ki ‘thei ka Mawlai naduh kaba sdang ki la ïoh ban pynkhih jar daiñ bad daiñ, ha kaba ki ‘thei ïalehkai dien ka Synroplang kim shym la lah satia ban shan ne ïada.
Ha kane ka jingïalehkai, ki lai ngut ki ‘thei ïalehkai ka Mawlai ki la ïoh ban khyrwit hat-trick, kata ka Baiarkynti Mylliemngap kaba la khyrwit kol ha ka minit ba 3, 18 bad 54, ka Makrisha Songthiang ha ka minit ba 34, 39, 61 bad 63 bad ka Charlinda Nongtdu ha ka minit ba 58, 67 bad 70’+1. Katba ïa kiwei pat ki kol la ïoh ban thep da ka Cynthia Mylliemumlong ha ka minit ba 24 bad 26, ka Dakini Shylla ha ka minit ba 35 bad ka Marbarin Nongrum ha ka minit ba 70’+2.
Ha kawei pat ka jingïalehkai jong ka Group-B ha kane ka sngi, ka Lumparing Sports Club ka la lah ban pynliem noh ïa ka Maw U-tieng Sports Club da 2-0 kol.
Ka Maw U-tieng, kaba la ïalehkai ïa ka jingïalehkai kaba ar ha kane ka lympung, ka la phai khmat ban khur jingjop ha kane ka sien kaba ar, hynrei watla ka la ïalehkai bha, kam shym la lah satia pat.
Ka Lumparing ka la ïoh ban thep ïa ka kol kaba nyngkong tad haduh shwa ban wai ka kylla step kaba la wan lyngba ka Chibasal Sangma. Ka kylla miet, ka la kham itynnad shuh shuh, ha kaba baroh ar liang ki la ïakhun tyngeh bad dei ha ka minit ba 49 ba ka Chibasal Sangma ka la ïoh ban thep ïa ka kol kaba ar, kaba la biang pura ïa ka Lumparing ban lah ban khur ïa ki 3 point pura.
Kumba ka long mynta ka Mawlai bad Lumparing ki la jop mar lai sien na ki lai tylli ki jingïalehkai, hynrei ïa ka kyrdan kaba nyngkong ha ka Group-B la bat da ka Mawlai namar ka jingïapher ha ka jingthep kol, kata ka Mawlai mynta ka la ïoh +25 ïa ka Maw U-tieng kaba la ïoh +17.
Lashai ka sngi pat ki jingïalehkai ha ka Group B, ka Kharang Sports Club kan ïakhun pyrshah ïa ka Iasnohktilang Football Club ha ka por 2:30 janmiet bad bud pat da ka jingïalehkai hapdeng ka Umpling Sports Club pyrshah ïa ka Mawkriah West Sports Club ha ka Group A ha ka por 4:15 janmiet.
