Shillong, Naitung 04:
Ka India ka la ïoh ban rah biang ïa ka nam lahduh jong ka lympung SAFF Championship 2023 hadien ba ka la lah ban pynliem noh ïa ka Kuwait ha ka final kaba la long ha ka janmiet sngi Ba-ar ha Sree Kanteerava Stadium, Bengaluru.
Ka jingïoh rah jong ka India ïa ka nam lahduh ka la wan lyngba ka jingïashut tie-breaker da 5-4 kol, kata hadien ba ka jingïalehkai ka la kut noh ha ka jingïakhaid da mar shi kol, kata wat hadien ka ‘extra time’.
Haba phai sha ka jingïalehkai, dei ka Kuwait kaba la ïoh ban khyrwit ïa ka kol kaba nyngkong lyngba u Shabib Al Khaldi ha ka minit kaba 15, hynrei kane kam shym la pynduh mynsiem ïa ki rangïalehkai ka India kiba la ïakhun tyngeh bad dei ha ka minit ba 38 ba u Lallianzuala Chhangte u la ïoh ban pynphai ïa kane ka shi kol.
Hadien bym don ba lah ban thep kol shuh, wat hadien ka 90 minit bad ‘Extra time’, kumta la rah sha ka jingïashut tie-breaker, ha kaba na ka liang ka Kuwait ka la lait noh ha kaba shut sdang hynrei ka jinglait noh jong u Udanta ruh ka la ai mynsiem biang ïa ka Kuwait bad haba kut ka jingïashut mar 5 sien, ki la ïoh ban thep mar 4 kol.
Ha kaba hynriew hadien ba ka India ka la tam biang, ka la dei sa ka pali jong u nongap kol u Gurpreet Sandhu, ban long biang u nam tam, ha kaba u la lah ban ïada ïa ka bol ba la shut da u kapten ka Kuwait u Hajiah bad ban pynlong syndon ïa ka India ban rah ïa ka nam lahduh.
Ka India ka la rah haduh 9 sien ïa ka nam lahduh jong ka SAFF Championship, kata kaba nyngkong eh ba ka la jop ka dei ha u snem 1993, nangta ha u 1997, 1999, 2005, 2009, 2011, 2015, 2021 bad mynta 2023 bad haduh saw sien pat ka ba ka India ka la rung sha ka final hynrei ban shah rem noh ha ka final.
