Jowai, Naitung 06:
Ka Moodop Royal, Pateinki Sabah, FAM bad Mookyrdup ki la khur jingjop ha ka lympung ïalehkai Third Division Football- 3rd Adelbert Laloo Memorial Trophy kaba pynïaid da ka West Jaiñtia District Sports Association (WJDSA) ha Kiang Nangbah Stadium ha ka sngi Palei.
Ka nam jop jong ka Moodop Royal ka la wan hadien ba ka lah ban pynliem da 2-1 kol ïa ka Chatholic Youth Mihmyntdu. U Wanshwa Laloo u la thep ar kol ha ka minit kaba 9′ bad 51′. Katba ïa ka shi kol na ka Catholic Youth Mihmyntdu la thep da u Firterborn Talang ha ka minit kaba 53′.
Ha ka jingïakhun kaba bud, ka Pateinki Sabah ka la jop haduh 4-0 kol pyrshah ïa ka Sohmynting Dongnein. U Treimi Shylla u la thep ar kol ha ka 3′ bad 33′, katba ïa ki shi kol la pynbud da uPynshngaiñ Shylla ha ka minit kaba 47′ bad Lakhon Dkhar ha ka minit ba 65′.
Ka FAM ka la pynliem noh ïa ka Kseh Sylle lyngba ka shi kol ba la thep da u Pynshngaiñmiki Papang ha ka minit kaba 36′.
Ha ka jingïakhun kaba khatduh jong kane ka sngi, ka Mookyrdup ka la jop da 2-0 kol ïa ka Khliehmyntdu Neinshnong Mihmyntdu. Ïa kine kol la thep da u Nidaiar Kamar ha ka minit kaba 65′ bad 70’+1.
Na ka liang ki bor pynïaid ki la pynbna ba kan ym don jingïalehkai ha ka Sngi Thohdieng bad Sngi Saitjaiñ na ka daw ba ka don ka jinglehkmen Behdieñkhlam ka Seiñraij Jowai.
