Shillong, Naitung 06:
Ka kynhun ïalehkai Indian Super League (ISL) ka NorthEast United FC ka la pynkhreh ban soi ïa u rangïalehkai shakhmat na Brazil u Ibson Pereira de Melo hadien ba u la long uba laitluid ban leit ïasoh sha kano kano ka klob kaba u sngewbit.
Une u rangïalehkai shakhmat un long uba ar na kiba nabar ri ban wan ïalehkai na kane ka klob ha ka aïom ïalehkai 2023-23.
“Ka NorthEast United ka la nangjan ban soi ïa u rangïalehkai shakhmat na Brazil u Ibson Pereira de Melo na ka bynta ka aïom ïalehkai 2023-24,” la pynpw ki khubor na katei ka klob.
Utei u rangïalehkai shakhmat u dei uba na Recife, Brazil. U la sdang ïa ka kam ïalehkai phutbol na ka ACD Potiguar ha 2014 bad u la ïoh ban ïalehkai tang ar sien na kane ka klob. Hadien u la pynïasoh sha ka kynhun ïalehkai second division ka Ethnikos Achna FC na ka bynta ka aïom ïalehkai 2013-14.
U la ïalehkai 25 sien na ka bynta ka Achniotes bad u la ïoh ban thep ar kol. Hadien u Ibson u la mih noh na Cyprus ha u 2015 na ka bynta ban soi ïa ka kontrak bad ka Ayia Napa FC. Na kane ka klob u la ïoh ban ïalehkai 16 sien bad u la ïoh ruh ban thep shi kol.
Sa shisien pat une u rangïalehkai shakhmat u la leit phai biang sha Cyprus bad ha kane ka kynti u la soi bad ka klob first division ka Pafos FC. U la ïoh ban mihkhmat na ka Pafos ha ki 21 sien ïakhun bad u la ïoh ruh ban thep kol ha ka aïom ïalehkai 2015-16. Ha kajuh ka aïom, une u rangïalehkai u la leit ïasoh sha kawei ka klob kaba na Cypriot ka Ermis Aradippou FC.
U la ïalehkai 36 sien, katba u la ïoh ban thep 7 kol bad ïarap pynbuh saw sien hashwa ba un bteng ïa ka aïom ïalehkai 2016-17. Hadien ba u la ïoh ban ïalehkai katto katne por ha Cyprus, une u rangïalehkai u la leit sha Portugal ha kaba u la soi ïa ka kontrak bad ka klob second-division ka CS Maritimo.
U Ibson u la ïoh ban ïalehkai 26 sien na ka bynta katei ka klob kaba na Portugal bad u la ïoh ban thep shi kol bad ïarap pynbuh lai sien. Ha u 2019, utei u rangïalehkai na Brazil u la wan sha dewbah Asia bad ha ka sien kaba nyngkong u la soi na ka bynta ka kynhun ïalehkai Thai League 2 ka Samat Prakan City 2.
