Shillong, Naitung 07:
Ka lympung ïalehkai District Level Inter School Subroto Mukherjee Cup Football Tournament 2023 ba la pynïaid da ka slem treikam ka District Sports Officer, North Garo Hills ka la poi sha kaba kut ha ka sngi Palei. Ha kane ka lympung ka Montfort HSS, Rongrong Union U.P.S bad ka Bakenang SS ki la khur ïa ka nam lahduh.
Ha ka jingïakhun final jong ka U-14 ki shynrang kaba la long ha Mini Stadium kaba ha Resubelpara, ka Montfort ka la pynliem noh ïa ka Resu Union SS da 3-1 kol. U Tapaz G. Momin u la thep ar kol ha ka minit kaba 47 & 50 bad ïa kawei pat la thep da u Sengbo K. Sangma (10). Katba na ka Resu Union la thep da u Eliakim R. Marak (41).
Ha ka jingïakhun final jong ka U-17 ki kynthei, ka Rongrong Union U.P.S ka la jop da 3-1 kol ïa ka Resu Union SS. Wat la ka Resu Union ka la ïoh ban pynkhih jar tang mar ïa sdang ka jingïalehkai lyngba ka Trisha K. Marak (5), hynrei ka Rongrong Union ka la lah ban pynphai kylla haduh lai kol lyngba ka Rikambe W. Sangma (15), Wanmisha Marak (21) bad ka Rikambe W. Sangma (25).
Haba phai sha ka jingïakhun final jong ka U-17 ki shynrang, ka Bakenang SS ka la pynliem noh ïa ka Resubelpara Girls HSS da 2-1 kol. Ïa kine kol la thep da u Chusrangky D. Sangma (13) bad u Chukan R. Marak (24). Katba na ka Resubelpara Girls la thep da u Tubirth Ch. Momin (17).
Kumta ka Montfort HSS, Rongrong Union U.P.S bad ka Bakenang SS kin mihkhmat ïa ka North Garo Hills sha ka State Level Subroto Cup ka ban long shen ha kane ka nongbah.
