Shillong, Naitung 14:
Ka Mawlai Sports Club bad ka Lumparing Sports Club ki la ïasam mar shi dor-thong (point) ha ka jingïalehkai kaba khatduh jong ka Group-B ha ka Women’s League 2023 ba la pynïaid da ka Shillong Sports Association. Kane ka wan jia hadien ba ïakhaid mar 3-3 kol, katba ka Laitkor SC ka la pynliem noh ïa ka PFR Football Academy da 3-1 kol ha ka sngi Thohdieng ha madan Third Ground, Polo.
Ka jingïakhun hapdeng ka Mawlai bad ka Lumparing ka la long kaba ïakhaid bha ha ka rukom ïalehkai naba ki la lah ban pyni ïa ka sap ïalehkai ba kyrpang.
Wat la ka Mawlai ka la ïalehkai tang shiteng madan, pynban kam shym la lah ban thep kol. Hynrei da ka jingïakhun tyngeh ki ’thei ïalehkai ka Lumparing ka la pynlong ban ïoh pynkhih jar ha ka minit kaba 25 lyngba ka Ïaphishisha Marbaniang.
Hadien shiteng kynta ka Mawlai ka la lah ban pynphai kylla lyngba ka free-kick ba la shut da ka Baiarkynti Mylliemngap ha ka minit kaba 33 na ka bynta ban ïakhaid mar shi kol.
Hadien ba la bteng biang ïa ka jingïakhun jong ka kylla miet, ka Mawlai ka la pyrshang ban ïakhun tyngeh ha kaba ka la ïoh ban thep ïa ka kol kaba ar lyngba ka Da-aijinsuk Basaiawmoit ha ka minit ba 41. Tang hadien shi minit ka Lumparing ka la lah ban pynïakhaid kylla lyngba ka Chibasal Sangma.
Ka Mawlai kaba long ruh ka kynhun ka bym pat shah rem ha baroh ar tylli ki aïom ïalehkai jong ka Women’s League, ka la ïoh biang ban thep ïa ka kol kaba lai lyngba ka Marbarin Nongrum (57′) hadien ba ka jingïarap pynbuh bol da kawei na ki para nongïalehkai.
Ha ka minit kaba 70 ka Ïaphishisha kam shym la lah ban pynurlong hadien ba ka ïoh ban shut ïa ka bol bad ka la leit dei na diengkol. Hynrei hadien shi minit ka Catherine Kharkongor (70’+1) ka la lah ban pynphai kylla na ka bynta ban pynlong ïa ka Lumparing ban ïakhaid mar 3-3 kol.
Da kane ka jingïakhaid ka la pynlong ïa kitei ki kynhun ban ïaryngkat mar 13 dor-thong (point) na ki san sien ïakhun. Hynrei ka Mawlai ka la ïoh ban lamkhmat lyngba ka jingïapher kol da ka jinglah thep kol ïa ka Lumparing kaba la hiar sha ka kyrdan ba-ar.
Haba phai sha kawei pat ka jingïakhun kaba la long kham hashwa, ka Laitkor ka la ïoh ban thep kol nyngkong lyngba ka Tracy Rympei ha ka minit kaba 6 bad ïa ka kol ba ar la bynrap da ka Ïaraplang Nongrum ha ka minit kaba 13. Ha ka minit kaba 23 ka Rympei ka la pynbud biang ïa ka kol ba ar na ka bynta ban pynlong ïa ka Laitkor ban tam da 3-0 kol.
Wat la ka la shah thep haduh 3 kol, hynrei ka PFR ka la ïakhun tyngeh ha ka kylla miet bad ka la ïoh ban pynphai kylla shi kol lyngba ka Elviorika Sohklet (57′) ha shwa ba kan mad ïa ka jingshah rem.
Lyngba kane ka jingjop ka Laitkor ka la ïai bat ïa ka kyrdan ba hakhlieh ha kaba la kamai 15 dor-thong (point), katba ka PFR ka la wan ba-ar da kaba kamai 12 dor-thong (point) na ki san sien ïakhun.
Kumta ka Laitkor kan ïakynduh semi final pyrshah ïa ka Lumparing bad ka Mawlai ïa ka PFR. Ïa kine ki jingïakhun semi final yn pynlong ha ka 24 tarik mynta u bnai ha SSA Stadium kaba ha First Ground.
Ki saw tylli ki jingïalehkai kiba dangsah kin bteng biang ha ka Lah Sngi U Blei ha kaba ka Maw U-Tieng SC kan ïakhun pyrshah ïa ka Ïasnohktilang Madanrting FC (Group-B) ha ka por 2:30 noh phai sngi, katba ka Umpling SC ïa ka Lawei Smit SC (Group-A) ha ka por 4:15 janmiet.
