Shillong, Naitung 14:
Hynñiew ngut ki dkhot ka All Meghalaya Sqay Association (AMSA) kaba dei ka synjuk kaba thymmai, ki la ïoh ban leit shim bynta sha ka 24th National Sqay Championship kaba la sdang naduh 23 haduh ka 26 tarik u Jylliew ha Kurushestra, Haryana.
Wat la ka dang dei ka sien kaba nyngkong, pynban ka long ka jingsarong ïa ka Jylla hi baroh kawei ba katei ka kynhun ïalehkai Sqay ka la ïoh ban shim bynta ha kaba ar ngut na ki la ïoh ban khur ïa ka nam jop da kaba khur ïa ki takma rnong.
Kine ki kynthup ïa ka Espiranza Stela Songthiang ha ka jingkhia kaba 50 kilo bad ka Saimi Phawa ha ka jingkhia kaba 48 kilo. Ha katei ka lympung la wan ïashim bynta kumba 29 tylli ki jylla na kylleng ka ri India.
Kat kum ka kyrwoh ba la pyllait da ka Gene-ral Secretary ka AMSA ka Kong Sumarlin Mary Warjri la ong ba ka Sqay (Indian Martial Arts) ka la ïoh ban rung ha ka thup jong ka National Games ka ban sa long ha Goa ryngkat bad 5 tylli kiwei pat ki jingïalehkai kiba thymmai. Namar kata, katei ka lympung ba la pynlong da ka Sqay Federation of India (SFI) ka long ban jied ïa ki kynhun na kylleng ka ri India ban ïoh ïa ka lad ban leit ïashim bynta ha ka 37th National Games ka ban sa long ha Goa ha u Risaw.
Ka AMSA kaba la ïoh lad ban shim bynta sha ka 37″ National Games ka ban sa long ha Goa, ka la buh ka jingkyrpad na ka tnat ïalehkai jong ka Sorkar Jylla bad ka MSOA khnang ba kan ïoh shim bynta ha ka Meghalaya Games ka ban sa long shen ha Tura, Garo Hills mynta u snem.
Shuh shuh ka AMSA ka dawa ruh na ki bor bahalor ban ai jingïarap lem khnang ba kan ïoh ban pynlong ïa ka prokram ai jinghikai (coaching camp) ryngkat ban pynbiang ïa ki tiar ki tar ruh bad ka bam tei met (diet) na ka bynta ki nongïalehkai kaba long shi bynta ban pynkhreh ha ka National Games.
