Shillong, Naitung 14:
Ka Nongthymmai Sports & Cultural Club ka dap da ka jingsngewsarong ba u General Secretary ka Meghalaya Basketball Association (MBA) u Bah Donald S. Wahlang uba lah shah jied ban long kum uwei na ki Vice President jong ka synjuk ïalehkai Basketball kaba heh duh jong ka ri India kata ka Basketball Federation of India (BFI) ha kine ki khyndiat sngi kiba la dep.
Halor kane ka jingïoh bat ïa ka kam Vice-President, ka klob ha ka Sngi Thohdieng ka la pynlong ïa ka jingïalang pynkup burom bad pynpaw ka jingsngewnguh kaba khraw ïa une u rangbah uba la wanrah nam ïalade bad ïa ka jaitbynriew Khasi hi baroh kawei ban ïoh bat kat kane ka kam kaba heh.
Kumta ka klob ka kitbok shuh shuh ïa u ban un nang ïai trei shitom bad ban kyntiew shuh shuh ïa kane ka jingïalehkai basketball khamtam ha ka Jylla hi baroh kawei. Ïa kane ka kyrwoh la pyllait da u Bah J.C Cajee, General Secretary ka Nongthymmai Sports & Cultural Club.
