Shillong, Naitung 18:
Ka Shillong Lajong FC kan ïakhun nyngkong pyrshah ïa ka kynhun ïalehkai Indian Super League, ka NorthEast United FC ha ka 132nd Durand Cup 2023 ka ban long ha ka 4 tarik u Nailar ha Indira Gandhi Athletic Stadium kaba ha Guwahati.
Kiwei pat ki kynhun kiba la don ha ka Group-D ki long ka FC Goa bad ka Downtown Heroes FC kaba na Kashmir.
Watla dangshen ki bor pynïaid jong ka Indian Army ki la jied ïa ka Shillong ka ban ïoh pynlong ïa ki katto katne ki jingïalehkai jong kane ka lympung ha ka sien kaba nyng-kong eh, hynrei na ka daw ka jingbym biang ki madan ïalehkai khamtam ka JN Stadium kaba dangdon hapdeng ka jingmaramot pynbha, ka la pynlong ban duh noh ïa kane ka kabu ksiar. Te kumta ïa ki jingïalehkai jong kane lympung ka la rai ban pynlong noh tang ha Guwahati, Kokrajhar bad ha Kolkata.
Ha kane ka lympung ïalehkai mynta u snem kin don haduh 24 tylli ki kynhun ki ban ïashim bynta kynthup ïa baroh 12 tylli ki kynhun ïalehkai ISL, I-League ryngkat ki ar tylli ki kynhun nabar ri kata na Bangladesh bad Nepal.
Kumba ka paw ka Lajong ka dangdei ka kynhun kaba dangthymmai ban ïashim bynta ha kane ka lympung hadien ba ka la wanphai biang sha ka I-League 2023-24.
Ka Bengaluru FC kaba dei ka lahduh ha u snem ba la lah hadien ba ka la lah ban pynliem noh ïa ka Mumbai City FC ha ka final jong u snem ba la lah. Ïa kitei ki 24 tylli ki kynhun la phiah ha ki saw tylli ki group, ha kaba ki hynriew tylli ki kynhun ki ban wan ha ki kyrdan ba hakhlieh bad ar tylli ki ban wan ba-ar kin ïoh rung sha ka quarter final.
Ka Guwahati bad ka Kokrajhar kin ïoh ban pynlong mar kawei ka jingïalehkai quarter final, katba ïa kiwei pat ki jingïakhun yn pynlong ha ka 3 tarik u Nailur ha Kolkata.
